呢個專欄首次同畢傑合作，佢嘅選擇以世界盃外圍賽為主，而我嘅亦都係一樣。上次國際賽推介德國揩嘢，德軍仲樣衰都輸埋0:1，俾蘋果波神等人恥笑咗幾日，今次死唔信邪，再向德軍埋手。
愛隊德國今晚喺萊比錫對列支敦士登，列支敦士登嘅級數俾佢哋低十幾班有多，場波就肯定贏硬，問題係點贏法同埋贏幾多粒。舊年佢哋作客列支敦士登，輕輕鬆鬆贏6:0，前年主場對另一支弱隊聖馬力諾，咁啱又係贏6:0，所以呢場波點可能開唔到「主其他」波膽呀，2.45倍熱就熱啲，不過應該好穩陣。另外，之前佢哋贏列支敦士登同埋聖馬力諾，半場都係贏1:0，今場波佢哋就算有當「弗」嘅普多斯基同埋馬里奧高美斯撐場，不過最前線冇咗把握力最強嘅高路斯，鋒力多多少少會有啲影響，而且講到近況都只係麻麻，既然係咁就博個[和/主]，賠率有6.2倍。
敲盧森堡贏3:1有50倍
至於盧森堡主場對拉脫維亞，主隊以前出名係魚腩部隊，輸親都輸大大鑊，但近呢幾年進步咗好多，上場友賽主場摸和比利時1:1，而喺舊年9月嘅世界盃外圍賽就作客贏瑞士2:1，爆個50倍客W同埋150倍波膽。拉脫維亞屬於前蘇聯球隊，但實力好一般，攻力唔銳利守力亦唔堅固。呢場扒冷博主隊贏3:1，有成50倍咁好分㗎！另外，瑞士呢班波名大於實，今晚作客摩爾多瓦，亦有機會陰溝裏翻船，就博主隊贏2:0開19倍波膽。
文：青蛙仔