民主黨噚日慶祝創黨15周年，回望15年歷史，離離合合、起起跌跌，白鴿黨人堅持走下去真係唔簡單。噚晚筵開80席，八成係街坊捧場，官場、政界都好畀面，財爺鬍鬚曾、林D9、林鄭、邱騰華等多個司局長都有捧場，行會召集人梁振英都有到。
副主席單仲偕話有邀請中聯辦、外交部駐港特派員公署同駐港解放軍，不過通通noshow，原因大家心照；政務司司長唐英年都唔見人，不過捐出六支靚紅酒畀民主黨拍賣籌款，仲實際。首次以民主黨副主席身份現身黨慶嘅卿姐話，雖然社民連鬧佢，但希望民主派日後可以繼續合作。毓民則賣口乖，噚晚話要向「民主派第一大黨學習」，又透露已向卿姐同部份官員致歉，強調社民連只係針對問責官員，會錫住公務員。