由奧運到八和風波，阿姐汪明荃寸土必爭發聲發力，結果，野蠻奶奶、聲大夾惡等等變成她的最新形容詞，阿姐這個凸顯江湖地位的尊稱也漸生歧義。有人理解為霸道，有人理解為我行我素。
掃地阿嬸可以稱之為阿姐，部門主管都係阿姐。入行40多年的汪明荃又如何演繹「阿姐」？下月公演的音樂劇《真係阿姐——汪明荃》，現年61歲的汪阿姐將真我個性搬上舞台，歌舞連場，考記性考體力，她說：「我想話畀大家知，我60歲都仲做到。」明晒。 撰文：卓寶花
汪明荃入行逾40年，其第一人稱歌舞劇《真係阿姐——汪明荃》也將於下月17至18日在紅館公演。劇本由杜國威操刀，高志森任創作總監，百老匯式歌舞，與五光十色華麗大舞台高度濃縮了阿姐的強悍認真本色，還有男友羅家英真情演出，其中一part是阿姐與十男十女演出長達20分鐘的純歌舞，頗具難度，阿姐希望游說不懂跳舞的家英哥一同演出。
為何歌舞劇取名為《真係阿姐》？阿姐解釋：「因為係講我嘅嘢、真性情同真實嘅一面，家『阿姐』個名都好濫用，掃地阿嬸都叫阿姐，我想話畀人知，真正嘅阿姐汪明荃係點樣，所以有份親自構思，講生活、工作、感情，連平日同助手、羅家英點相處都會講。」
搵家英上台爆肚
硬淨的阿姐與小男人家英哥怎樣談情，大家都想知，阿姐卻賣關子：「佢都係做番自己，例如我發火嗰陣佢會講一啲嘢，今次大家都冇私下溝通喺台上要講乜嘢，預咗佢會爆肚，但大家都熟悉大家性格，佢會知喺乜嘢位我會接到，相信呢幕都會有火花，可能我到時會忍唔住鬧佢一餐！」
阿姐在舞台上如何演繹阿姐，還是未知之數；現實生活中，阿姐卻總予人難以親近、作風嚴謹之感。訪問當天，無論擺甫士或轉動作，阿姐亦有參與意見，褲腳稍長她又想辦法叫工人即場修改，令視覺效果更美。那種追求完美的精神，其實來自不完美。
力求完美執到正
她坦言：「咁我乜嘢都唔夠人好，唔夠人高、唔夠人靚、身形又冇人咁好，如果我係Kelly（陳慧琳）就着乜嘢都靚啦，所以要自己努力，每個人都有自己風格，我唔會理人哋點睇自己，呢個就係我人生態度。
阿姐說：「其實我只係對工作認真，對自己要求高啫，一係唔好做，一做要做到最好，私底下同我傾偈我唔難相處。」
今次歌舞劇不少歌曲及舞步都重新編排，阿姐更挑戰難度練習爵士舞和踢踏舞，她說：「家係進入狀態，我每次練習時都會着緊身衫，睇番自己線條達唔達到理想，但仲想再結實啲。我想話畀大家知，我60歲都仲可以做到，其實呢樣嘢喺演藝事業裏面想做好耐，但一直冇機會。」
娛樂大家無懼蝕本
阿姐自問從不偷懶，皆因有觀眾的推動力，她早已視演藝為終身事業，故此對今次的舞台劇演出份外緊張，不容有失，而去年初計劃籌辦歌舞劇拍板後，正值遇上金融風暴，但未曾想過退縮。
阿姐說：「今次製作費幾大，演員都未必有人工出㗎，但計劃咗做就要做，唔可以突然間擱置，阿倫、克勤佢哋都照做『左麟右李』啦，觀眾都要娛樂。」今次阿姐找專人幫手設計服裝，化妝、燈光等均想突出舞台劇視覺效果，舞衣不算性感，阿姐笑言：「有quali唔怕騷，但冇吖嘛。」
