英雄莫問出處，港大噚日頒發名譽社會科學博士畀《信報》創辦人林山木（筆名林行止），宣讀讚詞嘅法律系教授韋健生（MichaelWilkinson）以非一般方式讚揚佢，話相信林行止係首位獲此殊榮嘅非法入境者！港大當然唔會隨便頒發名譽博士畀偷渡客，不過林行止確係做過人蛇，經澳門坐船屈蛇嚟香港，之後發奮向上，白手興家。
水警請食菠蘿包
由身無分文嘅偷渡客，變成新聞界傳奇人物，林行止真係堪稱傑出人蛇。據佢去年底喺〈林行止專欄〉中透露，佢1958年18歲時喺汕頭經澳門偷渡來港，入到香港水域，就俾水警截獲，蛇頭即時跳海逃走，全船人蛇被扣留。不過佢話當年水警好好人，竟然請佢哋坐低飲啖茶、食個包，而呢個包，後來佢先知道就係香港最地道民間美食──菠蘿包！
事隔半世紀，林行止對呢個包仍然念念不忘，令佢最回味嘅，可能係當中嗰份人情味。除咗食菠蘿包，林行止被羈留時亦食過皇家飯，佢話連偷渡客都感受到「皇恩浩蕩」，殖民地政府真係犀利。
呢次偷渡失敗，林行止被遣返澳門，冇幾耐佢再次出發，終於成功喺西環登陸，成為香港人。好多港人當年都係偷渡過嚟，然後開創事業，喺各行各業大放異彩。林行止噚日聽到舊事重提，表現冷靜，在場人士則對佢品嚐香港美食菠蘿包嘅經歷好有興趣，可惜港大冇預備菠蘿包，等大家同佢一齊重溫當年滋味。
除咗林行止外，港大噚日亦頒發名譽博士學位畀四位喺不同界別有傑出成就同貢獻嘅人士，分別係立法會前主席范徐麗泰、何東家族後人何鴻毅、港大校友會前主席莫慶堯，同埋俄羅斯天才音樂家祁辛（EvgenyIgorevichKissin）。
范太：搵工勿計較
范太代表各人致謝辭時，特別提到60年代佢港大畢業時，經濟同家一樣一片蕭條，好多大學生失業，不過大家唔計較人工低，總之有工就做，希望得到工作經驗日後可以搵份好工，佢勸勉應屆大學生都唔好氣餒，爭取機會學多啲嘢，第日受用不盡。
mailto:[email protected]
