金融海嘯最驚濤駭浪時期究竟係咪已過，成為近日股場中人熱談話題。事關人人見到全球股市由低位已企穩陣腳兼展開反彈，港股最近升勢更令不少股友感到意外，事關睇番本月上旬個環境，誰又能估到個市升得咁快？3月9日滙控（005）股價仲講緊大插至33元，唔少散戶還感覺股海愁雲慘霧，無晒方向。點知原來股海定律無變，就係全民最驚之時，個市見底。
除非你偏好沽空，否則星俠認為炒股，牛市點都好玩過熊市；曾聽過有人話熊市中可以買平貨，我炒股從來唔貪平，亦最怕越買越平，試問買隻股票之後若然日日個價陰住咁跌，投資，仲有乜意義呢？
受惠內地大興土木
若論業務多元化股份，新創建（659）都算係其中一隻，集團涉足建築、公路、金融等多項業務，盈利能力及現金流一向不俗，不過受到金融海嘯冲擊，新創建多少都受到影響。09年度（6月年結）中期盈利跌64%，只得8.13億元，主因係前年同期紅磡海濱南岸有10.15億元收益入賬，維持50%派息比率，中期息0.20元。
由於新創建業務大部份位於中港兩地，業務性質亦算受惠內地大興土木政策，相信盈利可重拾增長動力。新創建股價於9元至11元水平橫行已有兩個月，入市策略宜作中線收集，目標13.50元。
方星俠