【Laughing哥Reborn】Laughing哥生死近日成為城中熱話，無綫昨日播出一段Laughing哥擲公字決定命運的宣傳片，他今晚便會在《學警狙擊》大結局中翻生，為開拍《學警》第四輯留伏線。
劇集《學警狙擊》今晚將播出第29集和第30集大結局，由於謝天華飾演的Laughing哥近日人氣爆燈，上周三Laughing哥殉職後，不少觀眾網民紛紛要求無綫讓他翻生，無綫為順應民意，日前安排謝天華在灣仔警察總部補拍翻生鏡頭，並安排在今晚大結局最尾部份播出約一分鐘的片段。
為第四輯埋伏線
無綫為力谷今晚結局收視，特以Laughing哥生死作招徠，在昨日推出一段由謝天華全新拍攝的宣傳片，片段中，Laughing哥在警察總部故弄玄虛說：「命運係點，根本冇人知道，一切就由上天決定。」然後掟銀擲公字。
儘管無綫對Laughing哥生死大賣關子，但日前無綫安排謝天華到警察總部補拍，其實已露出Laughing哥翻生玄機。事緣之前播出劇情早已交代Laughing哥在警校還未畢業便被踢出校做卧底，且一做便做足9年，其間根本不可能在警察總部現身，故無綫今次安排Laughing哥在警察總部現身，理所當然是他翻生後的故事發展。有報道指Laughing哥在今晚補拍的一分鐘結局中，將會紮職受勳，但據悉無綫根本沒此安排，結局中Laughing哥會講一段頗玄的說話，給觀眾一個想像空間同時，更為開拍第四輯《學警》留伏線。
記者昨日致電謝天華問到Laughing哥如何翻生？他說：「日前我係補拍咗片段，當中有一部份係我會喺螢幕嘅box之中一啲警察資訊，目的係想認同番Laughing哥係警員身份。」至於最喜愛自己戲中那一場戲，他說：「我好鍾意同阿文（吳卓羲）嘅對手戲，其中有一場我暗示教佢點做一個卧底，以半個師傅身份幫佢喺社團鋪路。」雖然無綫未公佈開拍《學警》第四輯，但該劇監製黃偉聲將食住謝天華人氣力邀他夥拍汪明荃演出一部時裝新劇，並預計5月開工。
商場借勢搞活動
今晚《學警》一眾演員將相約飯局兼睇大結局，而金融海嘯下，商場也借Laughing哥氣勢來「搞旺個場」，其中荷李活廣場直播結局外，更會派發打氣包及約一千元消費券予每位現場觀眾，而奧海城二期商場則會舉行「Laughing哥復活之夜」，直播大結局同時，更安排掟5蚊銀擲公字送甜品，以及舉行第四輯《學警》故事創作比賽，送出千元超市禮券。
此外，無綫製作主任衛世輝昨日出席旺角一記者會時，透露有意找早前醉駕罪成的謝天華和湯盈盈，拍攝一個呼籲駕駛者切勿酒後駕駛的廣告，至於會否跟政府合作拍攝，他說：「初步同政府接觸緊，佢哋考慮當中。」
採訪：林妃、王連連
殺Laughing哥毛管戙
《學警狙擊》今晚播出大結局，謝天華飾演的Laughing哥令觀眾和網友同聲喝采。究竟同劇演員與Laughing哥做對手時，那一幕最深刻？
吳卓羲
「最深刻係開槍殺Laughing哥呢幕，之前自己睇劇本都睇到毛管戙，要警察殺警察、仲係殺一個亦師亦友嘅人真係好痛苦。」
陳鍵鋒
「好多人話我累死Laughing，呢一槍令到我俾好多人鬧，連朋友都sendSMS畀我鬧我。我最終發現Laughing係卧底呢幕，幾多內心戲。」
苗僑偉
「最鍾意第一集Laughing爆杯向我敬酒，同埋第22集我叫Laughing擲公字嚟決定生死呢兩幕。」
金剛
「與Laughing哥最深刻的一場戲是當孝哥懷疑他與阿文時，用心理戰去試他們，我要在身邊保護孝哥，那場戲大家都用心去演。」
周海媚
「有一場戲講Laughing哥借醉非禮我，點知我真係太用力摑過去，搞到Laughing哥塊面都紅晒，令我好難忘。」
陳山聰
「最鍾意第13集中同Laughing夾計扮爭地盤鬧不和，實質係向江世孝攞着數，好表露到我哋兄弟情。」
