噚日講開生意難做，夜市「鬼影」都無隻，之後班行家忽然興致勃勃，交更時圍埋高談闊論，集中神秘事件呢個話題起勢吹水，Laughing哥仲寸我夜晚唔好戴墨鏡，改配老花鏡！真係吹脹，我黃飛鴻份人係鍾意聲大大吹水，但個膽其實細過隻蚊，更唔會攞靈界朋友嚟開玩笑！就好似上個禮拜咁，半夜三更送個熟客入落馬洲，跟手梗係喺皇崗兜客出番市區喇，離遠見到一個男人拖住細路女等車，排緊隊嘅兩位行家居然無理佢，好似當佢「透明」咁，我以為唔啱路傾唔掂數喇，咪屈個圈兜番轉頭攞個客囉，點知前後唔夠20秒已經唔見咗，皇崗巴士站鬼咁空曠，無碇匿㗎？
都係多想無益，嗱嗱聲飆返出市區最多人嘅旺角，黐番啲人氣先。揸得夜更預咗多「好朋友」，我光明正大唔害人，更唔會叫糊扮棄糊咁陰濕，呢啲事唔會放在心上，查實好多生勾勾嘅人仲恐怖，幾騎呢嘅客都遇過，有機會再同大家呻。
文：黃師傅