立法會粗口風暴一發不可收拾，社民連三子日日開會爆粗不亦樂乎，噚日開特別財委會審議預算案時，長毛又狂鬧「叫曾蔭權去仆街啦！」批評特首幫唔到基層市民。在座嘅財經事務及庫務局副秘書長甯漢豪忍唔住，向主席卿姐投訴有人講粗口，指議員有失斯文教壞細路。
卿姐唔想糾纏於口舌之爭荒廢正事，休會10分鐘勸大家收口就算。點知長毛卻食住上，反駁官員有口話人冇口話自己，指政務司司長唐英年曾經喺議事堂上，公然大講吊吊fing，煲呔句疑似狗噏亦十分粗俗，相比之下，仆街同臭四都唔算粗口，點解兩個高官唔道歉？
唐唐為吊吊fing認錯
俾人擺上枱，唐英年噚晚出席公開場合時終於認衰，承認自己曾經喺議會上唔小心講說話，但強調當時絕對無意侵犯任何人，同社民連爆粗鬧人性質完全唔同。佢又指長毛等人將兩件事混為一談係擾亂視聽，佢要求立法會日後要採取有效措施，避免官員再受粗暴對待。
唐英年有膽認錯，真係好過煲呔講過狗噏唔認數多多聲。按照最新國情講法，立法會秘書處幫煲呔狗噏「和諧」做鬥噏，呢隻國產「河蟹」，原來已經南下嚟到香港。
煲呔話下屬frustrated
煲呔噚日喺禮賓府會見「專業會議」幾個成員，據講對近日爆粗風暴十分痛心，席間主動提起話好留意事件，又指議員口出惡言令唔少官員好frustrated（挫敗），因為無論做乜都俾議員鬧到狗血淋頭，好冇癮。
身為特首，睇住下屬俾人鬧非常感慨，希望議員口下留人，否則大家關係搞唔好，亦唔係香港之福。煲呔忽然大吹和諧風，唔知係咪想好似內地官方咁，和諧一切反動聲音，將河蟹引入立法會，見到任何風吹草動或者類似草泥馬物體出現就出動河蟹，將社民連三子和諧咗就耳根清靜啦。
根據內地網民資料，由國家培植嘅河蟹好醒目，只會針對官方唔啱聽嘅聲音，對於鬥噏或者吊吊fing呢啲官方用語，八方相信絕對唔會被人和諧咗去嘅，總之佢可以狗噏，你同佢鬥噏就唔得。
mailto:[email protected]