港股市底好強，回一日，又再急升，恒指大升486點，成功衝破14000點大關，上升正股超過630隻，中資股上升層面亦開始擴散，由資源同內房股發展到內銀同運輸股等，H指衝破8000點大關，急升522點，升幅6.5%。
中央宣佈要用10年時間，將上海打造成國際金融及航運中心，除加快人民幣國際化外，在一個國土上有兩個金融中心（上海和香港），亦有助中國加快成為經濟大國。
上海發展一日千里，未來10年，金融、航運、製造和服務業的建設將會全速進行，基建和地產亦需作出配合。上海已係在地方層面上最積極刺激樓市的城市之一，加上金融和航運中心建設的推動，上海地產業有機會出現強力復蘇。
以上海為主力的上置集團（1207），昨日便成為大力追捧的對象，以0.54元高價收市，大升9.1%，成交再大增到3900多萬股，已係連續第3日大成交，動力強勁，250日線在0.76元，將係升勢的第一站。
第一站睇0.76元
內房股中，上置極度落後，07年11月高位3.82元，現時0.54元，只係得1.4折；再講，由低位0.30元反彈，好多同業升幅都幾倍，上置仍只係升得80%。大股升完，就會輪到中小型股，資金一到位，升勢可以好急。
樓市不景時，土地係負累；樓市轉旺時，土地就會變番錢，加上現時銀行又放水，內房股全部生番，呢啲亦係近期股價急升的理由。
上置形勢其實幾好，08年上半年，盈利18.2億元，其中有14.87億元係公允值收益，全年計，即使一筆過將公允值盈利抹掉，全年只係賺5億元，每股盈利都有18仙，就算以0.76元第一個目標計，PE都只係4.7倍。呢個位，講緊升幅已超過4成。
08年中期結算，上置每股賬面資產淨值2.87元，計番物業跌價，打個7折，每股都值2元，股價重係大折讓7成，極少數內房股咁偏低。
郭兆誠