金融海嘯下，芬佬更難做，內地有位基金經理做到「過勞」，要請5個月病假，佢公司上投摩根仲公告天下㖭。據內地和訊網報道，上投摩根出公告話，投資總監孫延群因為要醫病，獲批放假5個月休養，暫停履行基金經理職務。
報道話佢有過勞症，但公告冇交代係咩病，佢同事就話孫延群上年因胃病入過院，唔知係咪舊病復發。胃病可以話係基金經理嘅「職業病」，呢行壓力大兼食無定時，撞正上市公司業績期仲要加班做研究報告。
孫延群喺內地基金界出名投資穩健，06年攞過《上海證券報》最佳股票型基金經理獎。佢05年加入上投摩根，上個禮拜五出席理柏中國基金獎時仲話：「投資者的信任也使我們倍感壓力。」
咁點解短暫離職都要出公告呢？估計係上投摩根做定嘢，配合4月出台嘅新修訂資訊披露規定，即係投資管理人員「擬離開工作崗位一個月以上」，就要向中證監報告。