唔知點解，呢輪人人都講起周星馳，繼王晶、文雋同李修賢先後公開討論星爺嘅為人之後，又輪到「三師兄」田啟文（田雞）同「小龍女」元秋。
早年加入星輝公司嘅田雞，一直係星爺嘅得力助手，直至早前同公司約滿，先冇再合作。對於星爺近日連番備受抨擊，田雞就喺佢個blog度發表幾篇文章，講吓呢位舊同事，仲用某人嚟稱呼星爺。雖然佢冇好似其他人咁鬧星爺，但就叫啲網友自行判斷星爺嘅為人，字裏行間仲好似有啲不滿星爺㖭。
心思難理解
田雞話星爺唔出席金像獎頒獎禮，覺得一啲都唔出奇：「沒有提名不出現，不感奇怪，但是有提名不出席，對很多人來說，會莫名其妙！我不覺得奇怪很簡單，因為我認識『他』！」田雞又舉咗個例子出嚟，話星爺成立星輝幾年，都唔識得一位做會計嘅同事：「『某人的心』經常想太多別的事，而忽略了身邊的人。還好忽略的是會計同事，如果是朋友或是親人，那會如何的想『某人』，說『某人』呢！」至於講到同星爺共事多年，田雞就話：「很多人認為我很幸運，可以與他共事，但當中的喜與樂，傷與悲，又豈是外人可以理解！」
元秋撐星爺
另一方面，元秋前晚喺中環出席MuseTalents開幕派對，仍然屬於星輝公司嘅佢就撐行星爺：「我有睇報道，佢唔係難相處，我哋合作開心，佢工作認真，亦都唔難相處，之前收工都有一齊食飯。」至於會唔會幫星爺平反，元秋就話：「唔需要，佢都唔mind，佢份人我行我素，暫時同佢未有合作，因為我遲啲會為TVB拍劇。」
田雞blog： http://tianqiwen.blog.sohu.com/
