湖人巨星拜恩喺NBA球場呼風喚雨，成功帶領湖人做咗西岸「1哥」；事業有成，我哋一定相信佢得力於「賢內助」雲妮莎（Vanessa）啦！其實雲妮莎麻煩多多，而家搞到惹埋官非，早前要女傭Maria狗屎中搵嘢，令女傭忍唔住劈炮兼告佢虐待。好彩Maria冇話好似香港受虐印傭咁，整啲漂白水畀拜恩一家幾口嘆，如果唔係，分分鐘釀成慘案都有之。
48歲嘅美國籍秘魯裔女傭Maria，喺07年9月至08年3月喺拜恩屋企做家庭傭工，年薪高達50,000美元（約38.9萬港元）；Maria初頭以為億萬球星出手闊綽，呢份實喺「筍工」啦，點知原來係惡夢嘅開始。
女傭指雲妮莎虐待狂
Maria周三透過律師指出，外表美麗動人嘅雲妮莎直頭係虐待狂，好鍾意當住拜恩同啲細路仔面前鬧佢，不斷咁彈佢手腳好慢、反應遲鈍、死蠢等等，藉以抬高「主人」嘅尊貴身份。
假如只係畀人鬧，睇錢份上都可以忍咗佢；Maria之後繼續爆料，話自問「唔求其又唔污糟」，但係雲妮莎時時遲畀人工，又唔計番超時工資畀佢，而且仲衰到冇幫佢買醫療保險；最過份嘅一次，係Maria不慎將雲妮莎件價值690蚊美金嘅靚衫放錯落洗衣機洗，雲妮莎見狀即時發晒癲，要Maria即刻去喺有狗屎嘅垃圾桶入面，搵番件衫嘅價錢牌，等佢計番Maria要賠幾多錢。
玩售貨員鬧湖人fans
我求大俠聽到呢度都嬲到震，高中畢業就嫁畀拜恩嘅雲妮莎，出晒名惡到得人驚，之前就試過買鞋時玩謝售貨員、當眾鬧爆啲湖人fans等等；拜恩本身好錫佢，03年涉嫌強姦後，除咗嗱嗱臨買隻800萬美元嘅鑽戒畀佢之外，亦都對雲妮莎更愛護有加。連Maria嘅律師都話，拜恩係好人一個，弊在好過頭，冇出手阻止老婆虐待，搞到雲妮莎俾告上法庭，直頭係愛佢變成害佢。
我求大俠不禁嘆一句：「好嘅就女人，唔好就累人」！拜恩咁多嘢煩，湖人fans睇怕都希望佢快啲大步檻過，千祈唔好影響季後賽嘅表現就得啦！