經常處於殺校邊緣嘅鮮魚行學校，經校長梁紀昌同各界人士搶救，今個學年成功開到兩班小一。梁校長救校故事，打動咗一位神秘奇男子林敦勇，決定將遺產全數捐畀鮮魚行學校，幫助貧窮學生。
林先生自言家住深水埗，知道梁校長好有心機培育學生，深受感動，有日行經學校，決定將遺產捐晒畀鮮魚行學校。至於佢副身家有幾多錢，實數八方就唔知，但佢噚日出示一本買賣倫敦銀嘅存摺，顯示戶口有300萬元，加上佢早前向梁校長展示有220萬元嘅中銀紅簿仔，加埋最少500幾萬元。
請導演區議員見證
林先生自言行年56歲，單身，已退休，以前做買賣印刷畫生意，佢話十年前曾應家姐要求，立遺囑將遺產留畀姨甥，但後來懷疑家姐想謀佢身家，所以決定改遺囑，捐畀鮮魚行學校。超級善長臨門，梁校長不敢怠慢，噚日邀請名導演古天農同油尖旺區議員陳文佑做遺囑見證人，免得日後打爭產官司。梁校長話，收到遺囑捐款同500幾萬元咁多錢，尚屬首次。