全球銀行市值排頭位嘅工商銀行（1398），舊年業績跑贏盈利大倒退嘅獅子銀行，榮升全球最賺錢銀號，一手籌劃工行上市嘅董事長姜建清，當然心情勁靚，加上又同策略股東高盛傾掂數，押後股份解凍期限，拆除股價受壓嘅隱形炸彈，難怪佢噚日喺瑞信投資論壇午餐會主講時，談笑風生，妙語如珠。
唔係自己做得特別好
姜董話，前年工行榮膺亞洲最賺錢銀行美譽，舊年又提前達標，喺「沒有對手下」，成為全世界盈利最高銀行。唔知係佢謙虛定坦白，姜建清話工行名列前茅，並唔係佢哋家寶號做得特別好，只係其他人做得差，人退我進，咁就高中狀元嘞。
環球經濟海嘯，中國都唔可以獨善其身，之不過，佢認為中國經濟隆冬已經過去，最近已隱隱透出幾分春意。睇姜董咁樣形容宏觀經濟，又幾富詩意噃。
要識化危機為轉機
不過，曙光雖然在望，國人切記戒驕戒躁，事關外圍形勢仍然存在不穩定性，銀行及經濟環境暗湧猶在，作為最大國有商銀舵手，姜董不忘引述胡溫格言，話越係困難時候，就越要堅定信心，溫總都話「信心比黃金貨幣更重要」。姜董相信，只要大家心存信念，全世界同祖國經濟，一定會走出隆冬，安度難關，化危機為轉機咁話喎。
李華華
mailto:[email protected]