由少爺占、Chris和小胡組成的野仔，三人不理金融海嘯影響，拿出六位數字金錢籌備音樂會。雖然是第一次自資搞騷，但他們不怕蝕錢，還笑言現場有很多紀念品發售，一於從中賺回本錢！
野仔將於下月11和12日在九展舉行「EasterAnimalsLive」音樂會，今次是少爺占、小胡和Chris第四次舉行音樂會，不同的是由於沒有唱片公司支持，故此今次要自掏六位數搞騷，自負盈虧。
預計大碟唔賣得
Chris日前說：「都好大風險㗎，呢個時勢仲拎咁多錢出嚟搞騷，但我哋又好想搞呀，於是三條友仔夾錢囉，所以條數一定要睇得好緊呀。」小胡眼看近來的音樂會，好像只有陳綺貞演唱會的門票是爆滿，他現時抱着豁出去的心態來看野仔音樂會門票的銷量，他說：「其實上年做騷時，我哋已經book定今年個場，咁惟有照計劃行事啦，家睇吓喺邊度可以慳番啲錢。」
至於少爺占已想定後着封蝕本門，他知道近年舉行音樂會，最受歡迎的不是歌手本身，而是現場售賣的紀念品，他笑說：「T恤同帽梗係唔少得啦，家仲要諗吓有乜嘢紀念品可以出，務求賺得幾多得幾多。我估我哋隻碟喺現場係最唔賣得嘅，到時就擺少啲貨，總之今次唔好彩蝕錢嘅話，我哋真係唔見兩三手滙控㗎。」
Donald展黑面相
少爺占又計劃音樂會當晚撥出部份場地，讓艾粒拍檔Donald舉行攝影展，他說：「佢同我講好想搞影展，咁我哋租啲地方畀佢搞囉，佢啲相係以『黑面』為主題，佢已經影咗鄧麗欣、黃柏高同傅穎等人嘅黑面相。」
採訪：李珮洳 攝影：陳慧安
服裝提供：Adidas
