華華噚日喺恒生（011）乒乓球學院嘅畢業禮上，見到該行常務董事兼副行政總裁潘仲賢，講起佢讀小學時細細粒，其他運動唔多啱，所以鍾意玩乒乓球，仲參加過校內比賽，但唔記得攞過咩獎。
華華記得，佢老頂副董事長兼行政總裁柯清輝，細個喺英皇讀書時都有打乒乓波，柯大俠即將退休，會唔會臨別一齊打番場波呢？潘仲賢話乒乓波就好少打嘞，高爾夫球就試過。咁啱佢未諗到送乜禮物畀柯大俠，不如送支高球球桿，跟手打番場告別恒生賽都好喎。
至於5月上任嘅新老頂梁高美懿，原來潘仲賢同梁太喺滙豐做咗20年同事。華華睇番資料，潘仲賢88年加入滙豐，先喺滙豐船務（滙豐喺亞洲提供船務貸款嘅公司）做副常務董事，到03年轉做滙豐銀行工商業務助理總經理；同年，梁太亦升做滙豐工商業務環球主管。今次兩人由滙豐並肩轉戰恒生，應該冇問題。