凡人如我，揸住車聽千零蚊機頭搭原裝喇叭，已High到頭搖又尾擺，3萬同30萬汽車音響，我真係分唔到。不過HiFi界兩大猛人就唔同，只聽兩首歌，即指出兩架改裝車嘅音響貴喺邊一忽，Setting有乜Over同唔妥等，HiFi級數高下立見！
記者：徐影龍
攝影：譚盈傑
低音轟機有講究
David話好少見MINI會裝貴價嘅音響，所以第一架先試聽CooperS，「由於車內無皇帝位，所以無可能跟家庭音響睇齊咁玩定位，聲靚變成唯一指標。中、高音喇叭表現算OK，值70分，而兩個低音單元用到成10"咁大，出嚟嘅能量感確實好夠，但我稍嫌Over咗啲，因為低音一多，變相會拉低高、中音條Curve，如人聲同琴聲一定會差。呢對低音擺喺較大嘅七人車度會好啲，相信車主係後生仔，鍾意轟機嗰類，所以先Tune成咁，不過Bass嘅表現真係好豐滿好實，值80分。
「其實大家喺裝音響時，已需要考慮自己喜好同定位，一係就玩高、中音甜聲，一係就以低音為主嘅轟機格，事關好難做到一套HiFi天下無敵乜都Fit到，而JL呢個牌子本身都有出貴價Amp（擴音機），去到幾十萬都有，品質屬中上級，尤其車種空間有限，裝唔落前後級嘅話，一個萬零蚊嘅JL500已足夠推郁高中低音喇叭，反而Budget盡量擺多啲喺喇叭度。買架原裝車返嚟，可以唔換機頭唔換Amp，但起碼要搞搞啲喇叭，情形就似用大電視睇碟，都唔會側邊喇叭仔嚟輸出一樣。都係嗰句，鍾意轟機嘅，Bass可以校大啲，但要注意番個質，量大係無用嘅，推出嚟只會鬆郁矇。雖然汽車音響有限制，但喇叭盡量都斜向咁擺，否則對正玻璃打番轉頭，名副其實玻璃聲，真係好嘥。」
Tune聲不妨誇張
AlanLee早喺10年前，已係首位港人考獲THX證書，回港後獨家幫人Set機而闖出名堂，我搵咗架車同音響都咁貴嘅改裝「波子」996畀佢試聽，「後方低音喇叭用咗纖維去做外殼，比起傳統木製音箱，Size及外形可作更大變化，若果要Fit到Porsche後方咁有限嘅空間，木製音箱好難做到。由於分成三個Amp，故低音表現相當不俗，夠力之餘，去到某個頻率都唔易出現共鳴，對於狹窄空間嚟講已算好好。中高音表現好但我嫌唔夠，可能同喇叭擺位有關，真係要靚聲，我寧願擺喺中控台上邊，即係接近車櫳中間部份，令到人聲可拉番過啲，唔會太側埋一邊。
「汽車音響同我哋聽開嘅Hi-End音響有好大分別，Hi-end要求係平均、自然，但汽車聆聽環境確實好差，所以要以行車時嘅噪音介入嚟做Tune車指標，如風聲、引擎聲等，調校方面誇張少少先蓋到啲雜聲，再應客人要求而加重高中低音嘅比例，其實絕大部份人都注重Bass多啲。由於車櫳空間真係有限，硬件大細同喇叭擺位變化唔多，我就較為着重TuneEQ，當然車主可按自己口味去Tune，但難在低音夠重時，要保持高中音清晰都唔係咁易，而且唔同音樂係需要唔同EQSetting，輕柔同動態都要Set，有啲機頭可以畀你慢慢Set，有啲就要動用到額外嘅EQ先校到，所以好多Hi-end熟客都搵我坐坐佢架車，聽吓行車時嘅音響表現有乜要執。」
唔好心急催交車
EncrustCostoms專改汽車發燒音響，負責人Edwin教大家裝機時，盡量唔好催促師傅，「九成客會心急攞車，但車櫳空間限制真係好大，由度位、佈局，到做纖維音箱都要幾日時間，裝完仲要慢慢試慢慢Tune，若果個客太急趕嘅，十幾項測試做唔晒嘅話，出嚟音色可以差好遠，花得咁多錢，寧願慢工出細貨好過。」
硬件自助餐
JBL660Gti$9,800（b）
極吸引嘅純白音響套裝，分音器採用高級線圈同電容，令分析力更進一步。
PioneerDEH-4150SD$1,200（d）
千零蚊機頭周街有，呢款勝在可即駁iPhone同iPod，毋須改裝咁麻煩。
JLAudioHD750/1$9,000（a）
擴音機，分析力高兼夠力水，特色係體積較細及薄，空間要求唔大，好多車都裝到。
ABYSSEL34PP$48,000（b）
連車都玩埋古老膽機，韓國全手製，店主話做得出嚟，唔使怕車震會整壞。
mtxAudio12"低音單元$1,980（c）
算較平民級別嘅重低音，特色反而賣大大件，店主話AudiA4都裝得落。
JLAudioSubwoofer$6,000（a）
12"低音單元，以2"薄身為賣點，裝車時音箱體積可設計得更靈活。
查詢：
（a）EncrustCustoms（28382666）
（b）運通汽車音響（27708331）
（c）PitStop（23926476）
（d）金輪音響（27704799）