自從有咗短加長減之後，短途客真係少咗好多，我哋呢班揸夜更又唔做八折嘅，閒日真係靜到鬼影都無隻！呀，吐口水講過，四方大哥大姐對唔住，我都係搵啖食啫，我已經遇過你哋幾次，嚇到家陣都仲驚緊，要搵阿鳳定定驚。生意難做，與其去火車站排長龍，我班老死就寧願落金雀會打番幾個東。噚日四點半交更飲茶時，車主老死Laughing哥又問我打唔打，唉，我夠想啦，每晚搵車租同油錢都掹掹緊，仲敢打牌咩。講開油錢，石油氣終於減價，每公升平兩毫幾子，做一晚計落慳到十幾蚊，唔夠一支旗，雖然灣仔油站條車龍會長上加長，不過總叫做好過無啦，Laughing哥嗰邊啲車租又減無可減，佢每個月都要倒貼幾千蚊嚟供車，仲點好意思開聲。
文：黃師傅