程介南與陶傑，一個是前民建聯副主席兼立法會議員，一個是當代才子兼時事評論員，河水不犯井水？錯了，實情兩人年齡相差只八年，卻是師徒關係。見面話當年，嬉笑怒罵，程介南嬉笑母校點滴，謂陶傑根本不風流；陶傑怒罵議員低手，掟蕉拍枱狂吠只為做秀。
記者：蒙為亮
攝影：梁細權
程介南
前民建聯副主席，曾任香港立法局及立法會議員，曾主持亞洲電視節目《亞洲新視野》，現擔任公關公司總經理。
陶傑
原名曹捷，專欄作家及傳媒工作者，有「第一才子」之稱，善用文化角度論政，在報章雜誌發表文章，批評中國文化陋習及中港政府敗政，有《天國的凱歌》、《恭敬有罪──陶傑短評》等超過40部著作。
程=程介南
陶=陶傑
赴英練成冰火五重天
常言自古才子多風流，黃霑、倪匡、倪震、新進才子王貽興如是，陶傑自然不在話下。今天的他才情橫溢風流瀟灑，但在班主任程介南眼中，昔日的他根本名不經傳，只是個不修邊幅兼沉默寡言的培僑學生，陶傑聞此笑道：「我驚槍打出頭鳥嘛，話晒我讀嘅係左派學校，哈哈。」
程：我教過你中文同美術，當年對你印象唔深。做老師只記得兩種學生，一種好曳好多口又唔守規矩，另一種係品學兼優好學生。你呢，兩種都唔係，着校服唔整齊又唔同其他同學玩，同「風流」兩個字扯唔上關係。
陶：當時仲未開竅，五十年代出世嘅人真係好純情㗎，邊似家啲學生哥咁，十四、五歲就玩4P？嗰個年代，去圖書館借小說返屋企，有得睇小說已經好心滿意足。
程：我唔係講呢樣，我係話你好少同同學仔傾偈，好似好孤高咁，又唔似家咁能言善辯牙擦擦。點解會變成咁？去英國留學學番嚟嘅？
陶：初中時期學藝未精，都係低調啲好，所謂槍打出頭鳥嘛。舉個例子，當年五四運動，就係因為北大學生自以為是搞學運，打倒孔家店又燒經書，令幾多中國文學經典失傳！我覺得，尤其係喺中國人社會長大嘅青少年，細個應該少說話多吸收，訥於言而敏於行，到有機會先一次過發表。好似我咁，細個借子彈，去英國讀書練劍磨刀，先可以練成今日嘅「冰火五重天」。
程：哈哈，你唔講我都唔知「冰火五重天」係由英國傳返嚟嘅，哈哈……對你印象最深都係支筆，以當時中二計，基本功打得好，你有篇散文〈屋之輓歌〉，奪得1976年全港中學生徵文比賽冠軍，又試過投稿《新晚報》，我諗同你爸爸媽媽都係傳媒人好有關係。
陶：都係嘅，我老竇喺《大公報》返工，耳濡目染，我都睇好多古典文學同報紙，對寫作唔多唔少有幫助，而且當年無潮語，所以文筆自然比較流暢。
愛國學校少播國歌
二人的母校，正是傳統被稱為左派愛國學校的培僑中學，一說到「左派」，二人異口同聲認為這標籤不妥，更聲言非常享受母校的學習氣氛，回歸後打正旗號的愛國學校反而買少見少。昔日的親中學校，是否日日國歌當校歌播不停，上中史堂就得背毛語錄？
程：太誇張嘞，其實除國慶外，母校唔會成日播國歌，圖書館都唔係只得愛國書籍，不過就唔知點解仲有本《紅軍長征回憶錄》。其實六、七十年代嘅香港社會，左派學校先至係少數，我去英國讀教育文憑再返香港教書，當時港英政府竟然界定左派學校為外國學校！唔係賣花讚花香，我覺得左派學校有兩樣嘢好，一，由細到大培養到公民意識，你係中國人，一世都係中國人；二，學生比較純樸，想壞都唔壞得去邊。
陶：呢點我非常認同，以我爸爸為例，因為佢做《大公報》，所以一心想我讀培僑。當時年紀小，有書讀就讀，邊有得揀咁幸福。我覺得左派學校根本唔需要日日播國歌，日日講政治講愛國，因為讀得呢間學校，唔使講你本身都Feel得到，呢個就係共產黨最叻嘅地方。學校畀我嘅感覺，有啲似太平天國，自己獨立運作，有自己學校電台、飯堂，學校仲要開喺半山，好三不管。
程：嗰個年頭，邊有小朋友話事呢支歌仔唱，入唔入培僑全由家長決定，但凡知書識禮嘅父母、愛國分子都會選擇培僑。
陶：其實分乜鬼左派唔左派愛國唔愛國吖，全部都係約定俗成一廂情願，唔通左派之外嘅學校全部係右派？愛國之外就唔愛國？有太多灰色地帶，唔可以一面倒話自己巴閉定封閉，小撮人孤芳自賞根本無意思。講真，我童年嘅學校生活算快樂，除咗美術比較低分之外。
程：你着衫咁Hea，衫又唔摺好，點畀高分你呀？大哥！
議會花樣不可一不可再
今年立法會可謂烽火連三月，黃毓民掟蕉、長毛大叫、大嚿拉Banner，政治娛樂化開會當做騷，好睇過演唱會。畫面太震撼了，簡直可媲美Laughing哥之死，這種近似台灣的議會文化會愈演愈烈嗎？會不會有一天，搏擊大賽K1的主場館會移師我們尊貴的立法會？
程：我睇未必，我自己都做過議員，佢哋無非想爭取人心背向，要選票，多過真心做騷。議會上表現得火紅火綠，返番休息室又可以攬頭攬頸，呢啲嘢你哋又知得幾多？為存厚道，唔公開佢哋個名比較好，哈哈。
陶：無錯，越低調越好，最好提都唔提，唔提，佢哋就唔會再搞事。
程：佢哋已經搞唔出乜嘢花樣啦，其實細心留意吓，你會發覺佢哋真係有排練過，唔會真打，唔會傷人，因為刑事罪要坐監㗎，何況議會規矩都有個容忍度。家已經係極限㗎嘞，再生事對佢哋都無好處，呢啲嘢，其實就好似毒品宣傳口號一樣：「不可一，不可再。」
陶：時勢造英雄啫，其實香港係個唔需要民主嘅地方，唔信？如果特首家立刻令恒指升番上三萬點，即刻無人敢掟蕉，就算掟都無人會理佢哋，反而仲會俾香港人認為係無風起浪嘅搞事分子；又如果特首再叻啲，令恒指升上四萬點，可以即刻立廿三條，一定無人阿支阿佐。
程：講番句公道說話，做議員一定要負責拆屋，當年我都一樣，不過我比較溫文，忠忠直直終須乞食囉，試過連任唔到囉。香港市民好聰明，況且政局會變，好似嗰場經典特首之戰，梁家傑對曾蔭權，一個拆屋人，一個當家人，有得揀當然揀當家啦，拆屋人繼續拆屋已經足夠。
陶：家就係當家嗰班人唔生性，人哋掟蕉你就加生果金，點解唔喺掟蕉之前，先知先覺加生果金畀老人家呢？倒番轉頭，佢哋一掟蕉反而減三百，睇吓邊個仲敢掟？搞成咁，係因為香港班高官腳軟無膽識，與人無尤。
後記
兩人工作範圍、政治立場及輩份有別，老師總維護學校，學生卻總對學校沒好感，時事評論員總要問責議員政策失當，議員又會反攻他們雞蛋裏挑骨頭。每有分歧，身為學生的陶傑，皆一反平日之唇槍舌劍，恭敬打圓場，一日為師終身為師，可幸放洋留學的他，尚存儒學尊師重道精神。
註：兩人將現身逢星期二7:00pm翡翠台播映的《緣來有段故》及香港電台網上廣播站台（ http://tv.rthk.org.hk）的視像直播。