在下乃超齡小丸子迷，攬住瞓嗰隻。月前出trip出正靜岡縣小丸子Land，便激發本人以最高速影完應影嘅相後，飛身入shop執了兩袋小丸子限定版紀念品，簽緊卡，冷不提防一男一女在我身邊出現：「我是小丸子爺爺，她是小丸子媽媽。」
我瞄瞄二人，咪頭先打過招呼那兩位大會職員？普通上班族咁嘅樣咋喎？搞爛gag嗎？我抽住小丸子Land膠袋，感覺三條黑線在我額角湧現。接着男子從懷中掏出一張印刷精美排版優良的報紙，我呆了兩秒才懂反應，呢張係敝報港聞版噃！點解佢會有？「我們一月去過香港，呢個咪我哋囉！」男子興奮道。原來年頭維港花車巡遊小丸子一家，唔係出錢請人扮，係公司職員粉墨登場客串㗎！由圖中男子扮阿爺，女子扮阿媽。日本人之敬業精神可見一斑。話時話，如果公司叫我扮蘋果遊街，我真係唔知點算好。
記者：劉嘉蕙