毓民前日喺立法會特別財委會上向林D9連環爆粗，鬧完仆街再鬧臭四，唔少議員覺得好唔啱聽，政府中人更加腳震震，驚自己成為下一個被問候對象。政務司司長唐英年噚日擺官威，首度三信齊發，致函立法會主席曾鈺成、內會主席劉健儀及財委會主席卿姐，投訴有議員喺會議上使用粗言穢語，對此深表遺憾，指呢種行為衝擊議事規則。
唐唐喺信中仲質疑身為主席嘅卿姐點解唔即時制止議員爆粗，為人公道嘅卿姐呼寃，強調當時真係聽唔到有人講粗口，又話唔使官員提醒，佢自己都唔會接受侮辱性語言，如果日後有人聽到，可以通知佢處理。曾鈺成就透過發言人話議員喺財委會爆粗，應該由卿姐處理，佢乜都聽唔到，一於明哲保身。