章小蕙近年轉戰美國，身邊男伴如走馬燈轉不停。前晚她一身性感打扮連踩兩場，先去圓方出席首映禮，其後再與陳樹渠長子陳燿璋和孔子第78代直系後裔、台灣女星安雅的男友孔眾及另一男士，一拖三去中環四季酒店，深宵夜會兩粒鐘。
章小蕙05年開始於美國打躉，博躋身荷李活，其間屢被拍得與不同男伴約會，去年她成功拉攏英皇娛樂老闆楊受成投資奧利華史東（OliverStone）的新片《W.殊不簡單》（W.），而她就擔任監製及演員，前晚她風騷現身，與楊受成和奧利華史東齊到圓方出席該片首映禮，活動後章小蕙繼續拼搏，相約三名男子到中環四季酒店密會。
孔子後人熱情
45歲的章小蕙前晚身穿低胸連身裙出席首映，凌晨12時她與母親及胞弟離開戲院，三人分道揚鑣後，章小蕙會合一名瘦削男伴登上一輛平治，當時車內尚有另一男子，她夾坐兩男中間，一行人到中環四季酒店。
至近3時，在酒店逗留兩粒鐘的章小蕙與三名男子一起離開，原來同行男伴中有兩位是名人之後，包括去年曾傳追求汪圓圓的陳樹渠長子陳燿璋，及孔子第78代直系後裔、安雅男友孔眾（原名孔維眾）。現場見孔眾對章小蕙尤其熱情，攬着她兩度goodbyekiss，最後章小蕙乘坐陳燿璋的平治，由瘦削男伴冒雨護送她返半山樓香閨。
助阿嬌轉攻美
記者昨致電陳燿璋時，他直認前晚確與章小蕙夜會，但大家只是到酒店出席奧利華史東的酒會，陳燿璋說：「我細佬（陳燿陽）喺美國做獨立製片，希望同奧利華史東合作，我同章小蕙都好熟，噚晚安雅個男友孔眾都喺度，仲有位係眼科醫生。」章小蕙昨在電話中說：「噚晚係陳燿璋佢哋想我介紹奧利華史東畀佢哋識，約咗喺四季入面間bar，冇上房。佢哋都係奧利華史東嘅影迷，仲攞簽名㖭，佢哋唔係追求者，我同陳燿璋識咗好耐啦。」
周身刀的章小蕙不只身邊富豪好友多，前晚她在首映禮上更自誇成功之道，稱《W.》已回本，他日在港推出DVD更有分紅，她說：「多謝奧利華史東同楊受成，令我可以去到國際矚目嘅境界，家我有幾部戲傾緊，都想搵亞洲演員合作。」
章小蕙表示有意推薦淫照女主角鍾欣桐（阿嬌）合作，提到阿嬌在《W.》的戲份被刪剪，問章小蕙會否擔心被阿嬌連累時，她說：「上次佢被cut唔關事，係片太長，太多人有太多歷史，佢唔一定做舞孃或者做玉女，呢啲冇絕對。」
採訪、攝影：娛樂突發組、王崇穎