愛國、報國有好多方法，只要唔似香港政客、商人咁得把口就得啦！我哋簡稱英軍嘅英格蘭國家隊，周二同一批包括執勤時斷肢嘅真正英軍見面，結果似乎係班國腳調返轉頭慰勞呢班國家英雄，大家雞啄唔斷、哄堂大笑，一幕英軍慰勞英軍令雙方都度過愉快嘅一天。
碧咸捉住假手嚇到面青
英格蘭國腳們近日喺阿仙奴訓練基地，備戰周六對斯洛伐克嘅熱身賽同下周對烏克蘭嘅世盃外。前日一班英兵嚟到基地觀操，之後一齊去酒店開餐，交流心得咁話。「我隻手啊！我隻手啊！」一名黑人士兵突然大叫。揸住隻假手嘅碧咸嚇到面青，見對方大笑先知被整蠱，笑住邊爆粗邊話：「真係估你唔到！」
呢個頑皮士兵叫墨豆（Mcbean），係黑人版「戇豆先生」，喺阿富汗執勤冇咗左手同一隻腳。碧咸同佢講：「如果我冇咗隻腳真係唔知點算。」碧咸冇隻腳肯定驚動球壇，不過佢買咁重保險，名副其實係「打跛腳都唔憂啦！」班英兵就唔同，1年人工不多於2萬鎊（約23萬港元），你話係咪同人唔同命呢？
傷殘英兵卧虎藏龍
不過，好多嘢唔可以用錢衡量，年薪730萬鎊嘅隊長泰利上台講：「佢哋先係真英雄，佢哋因足球而仰望我哋，但傾多幾句後，我完全被對方征服！」當日唔少英軍同足球好有緣，其中一名士兵迪朗細個曾代表布里斯托城青年軍同里奧費迪南、林柏特交過手；直升機師杜格拉斯嘅阿爺更猛料，曾36次代表英格蘭國家隊上陣㖭！之後球星們紛紛喺義肢度簽名，現場一片歡樂氣氛。
我求大俠覺得泰利等人唔使面紅，揸槍報國固然可敬，但着起英格蘭國家隊波衫比賽，同樣係報答國家，亦好值得普羅大眾尊敬。希望呢班國腳今次見過呢班真英雄後，會變得更謙虛同努力，嚟緊熱身賽同世盃外加多兩錢肉緊，用好波多謝呢班英軍啦！