一年一度香港打吡大賽，於三月二十二日舉行，呢項大賽嘅總獎金（一至六名都有獎金，第六名可得三十二萬元）共一千六百萬元，據講係全球第二高，冠軍可得58%，即九百二十八萬元，係一筆巨款，但對於今年嘅冠軍「閒話一句」嘅馬主團體嚟講，係濕濕碎啫。呢隻超級靚馬嘅來價，聽評馬人講，係九十萬英鎊，過千萬港紙㗎。雖然隻馬出三場，得兩冠一亞，已得獎金一千一百一十六萬三千大元，七折實收係七百八十萬多啲，仲未夠買馬費噃。不過呢隻馬跑二千米贏得咁輕鬆，當對手冇到，以後勢必成為香港一級賽嘅擂台躉，年尾香港國際盃賽，邊隻馬要贏，首先要砌低「閒話一句」。
打吡係賽馬盛事，大馬主科技K以前贏過打吡，年年在打吡日包下廂房邀請各國領事，商界名人到馬場睇跑馬，今年當然唔例外。科技K請埋左丁山去，當然樂意奉陪。凡此場合，應酬多過下注，坐在旁邊嘅退休議員會計L只係見買飛，唔見收錢，問佢係唔係場場輸？會計L話：「唔係噃，不過如果每次我贏咗，就將張飛交畀老婆收錢，贏錢係佢袋，輸錢就我出！」如此老公又幾好喎，唔怪得L太成日贏錢，皆因佢只識收錢！
跟住見到大賓架M，行見面禮，親親面龐，恭喜佢就快去做恒生大班，賓架M又係唔識落注嘅，一切自有老公牙醫A代勞。牙醫A當然係賽馬專家啦，佢有份嘅皇仁賽馬團體今季贏馬停不了，幾十倍嘅「皇龍飛駒」都一樣照爆，問佢有冇贏到大錢，牙醫A話：「我哋成班男人都話隻馬咁冷邊有機會吖，唔使睇，但我哋嘅太太就話有幾十倍唔買，等幾時買呀，結果真係爆大冷，我哋班男士你望我，我望你，睇住太太們排隊收錢！」賭馬就是這樣的，男士講理性，女士講感性，賽後往往係女士笑得最甜！科技K平時好鍾意落注，不過呢日為咗招呼百幾名客人，左騰又騰，忙個不了，邊有時間睇馬吖，百忙之中，佢介紹一位老前輩畀左丁山認識，老前輩話日日睇「GiGi細語」，睇到唔停得咁講，左丁山受寵若驚，急忙對前輩講：「我還未入學，阿爸已經教我睇你嗰本《幸運馬簿》，一直到家。」嘩，此日認識黃泠先生，一大收穫也。