繼英國標準人壽摺埋香港資產管理部門，噚日華華又聽到保險公司炒人消息，同樣針對資產管理部門。據財經雜誌《AsianInvestor》報道，英國保誠上個禮拜五，分別裁減港、星資產管理部9人同20人，兩地員工縮減至29人同239人。
聽講香港方面主要係裁走高層，將成個宏觀策略研究部摺埋。新加坡就牽連較多員工，包括交易、股票、固定收入同行政部。報道引述保誠話，嚟緊仲會繼續檢討各部門運作，咁即係唔排除再有人out啦。
不過，被叮走嘅員工都冇一肚怨氣，仲讚保誠有情有義，點解？因為呢批員工早就投閒置散，冇實際工作要做，好似香港個研究部一年前已被廢武功，但保誠都發埋花紅先裁員，等員工多個錢壓袋，都算良心僱主喎。