真係唔明白，點解時代越進步，大家行為操守反而越退步呢？早幾晚突然想食九龍城××館嘅白果糖水，於是由淺水灣揸車過九龍。喺隧道入面，見前幾部車無端端左扭右扭，差啲衝過隔籬線鬼咁牙煙，望真啲，應該係個司機俾後面部車對白光燈「燦」到所致。唔知幾時潮流興咩白光燈，班後生個個走去將部車嘅頭燈改晒白光燈咁叻呀！
大姨媽我揸開嘅車，後鏡同側鏡都有Anti-glare功能，會自動減光，之但係邊得嚟部部車都有咁嘅功能，好話唔好聽，開得大燈都係夜晚，夜麻麻唔會戴副超揸車咁叻啩？對頭車一對大光燈照埋嚟，唔好彩望到就隨時「盲」幾秒，好容易會引致意外。我揸咗幾十年車，都係近幾年至見咁多後生嘅車裝晒呢啲燈，唔理合唔合法，齋講道理，話晒燈都係用嚟照明唔係照車，唔該將對燈調番低照向路面，出入隧道時唔使「燦」到前面部車個後鏡同側鏡形同廢物，咩都睇唔到至得㗎！操守同潮流係無衝突，合法嘅點改都無人理，入隧道又或者行緊雙線對頭路時，熄一熄大燈用低燈有幾辛苦啫，操守嚟㗎唔該！