唔好以為我求大俠只係足球迷，其實對賽車都好有興趣；上季F1最後一站巴西站，麥拿侖車隊嘅「黑帝」咸姆頓，最後一刻趕得上第5位，搞到贏咗呢站冠軍嘅法拉利車手馬沙，喺車手榜總成績輸一分畀「黑帝」，失落總冠軍，馬沙老婆由狂歡變成傷心，屈居車手榜亞軍嘅馬沙，含淚多謝主場車迷支持嘅畫面，仍然歷歷在目。
「佢哋車隊未準備好」
唔經唔覺，新一季F1今個星期又展開，馬沙周一就到達澳洲，準備周末展開嘅墨爾本站揭幕戰；馬沙賽前接受訪問時，就挑釁麥拿侖車隊同宿敵「黑帝」咸姆頓。馬沙大講風凉話：「講真，我好驚訝麥拿侖喺試車時落後咁遠，咁多年嚟都未遇過呢個情況；好多人講試車成績唔代表一切，真正比賽喺周末先展開，但試車遠遠落後，就證明車隊冇準備妥當。」馬沙講到好似一副「咸姆頓，見到我尾燈就當你贏」咁款！
麥拿侖自己唔爭氣，又抵馬沙串嘅，今季以MP4-24新車出戰，效果就認真麻麻，喺西班牙巴塞隆拿為期4日嘅試車中，有兩日係麥拿侖車手高華利倫同咸姆頓「包艇」；3月12日最後一日試車，咸姆頓出盡力都係得第8。
黑帝死撐：遲吓會勁啲
「黑帝」仍然死撐話：「我對車隊有百分百信心，雖然今季初戰車發展有啲落後，但我絕對相信賽季展開後，車隊會越嚟越強。」
但連車隊總裁域馬殊都話，MP4-24唔夠快，表現令佢哋失望，恐怕咸姆頓要衞冕墨爾本站，真係難上加難。
講真今季F1開鑼前真係一波三折，國際汽車聯會諗住更改車手積分制度，由分站總冠軍多少決定總冠軍誰屬，如果呢個制度上季實施，馬沙已成為總冠軍；不過經過F1車隊聯盟反對，積分制度今季先至不變，要下季先實施。今季如果宿敵咸姆頓真係脫腳，馬沙真係要好好把握機會，贏番個總冠軍先得嘞！