經常批評本地大學嘅港產世界級數學家丘成桐，噚日發炮指有高等院校豪花約100萬美金，請一位知名教授嚟香港做研究，但佢只係同自己學生合作，唔帶本地生，結果只會令間院校風光一番，「可以同UGC（大學教資會）講，我哋有猛人喺度，但大教授嚟主要目標係攞錢（做研究）。」
請知名教授如買花
丘教授話，咁樣邀請知名教授，香港整體冇乜得益，「等如買花一樣，對香港唔係好，因為佢哋邊得閒真正幫到培養本地學生、本地學術研究。」最弊係香港政府一樣本末倒置，以為咁就等如培養到人才。
第二個俾丘教授鬧嘅係企業家，佢話10年前已經話香港要發展高科技，但當時商界朋友話要做金融中心，結果金融風暴搞到爆晒煲。第三個要鬧嘅係家長，因為家長成日都以為讀數冇出路，丘教授話其實唔少華爾街專家同企業高層都係讀數出身，兩星期前仲有獵頭公司搵佢去做投資顧問，年薪高達百萬美金，係佢家嘅三倍，不過佢不為所動。
丘教授下月4號就60歲，除咗有人搵佢去華爾街，都有人搵佢留喺香港做大學校長，不過佢想用多啲時間做研究，所以拒絕晒。丘成桐係哈佛大學教授，今次應中大邀請返嚟慶祝60大壽，兼喺星期六嘅「數學新浪潮」講幾何。