呢期搭車玩《機戰K》，返屋企又要拎隻春麗出嚟招呼朋友，《人中之龍3》都未爆呀！如果唔係睇咗《保衞奇俠》中咗毒，都唔會上網搵到呢隻漏網Game。《Watchmen：TheEndIsNigh》同電影同步登場，你可扮演墨譜怪傑或夜梟二世，揦起碌棍就毆，打甩班流氓下巴；睇過戲都知啦，拳拳到肉嘢嘢爆缸，係機迷發洩嘅妙品！妙品！
文：Loving哥
前傳故事陸續有嚟
背景畫面做得唔差、光源處理亦夠黑沉味道、1080i顯示支援Dolby、風格同電影幾同步、肉搏招式夠血腥。先講幾句電影劇情，原著係DCcomics作品，講一班美國英雄被政府放棄，禁用私刑下隱居嘅隱居、黐線嘅入青山。
背景係八十年代美蘇冷戰期，直到佢哋一個舊同伴被謀殺後，先揭發原來一個另類嘅阻止核戰方法已經秘密進行……不過講到隻Game，故事就有啲令人失望，因為佢唔跟電影劇情、玩前傳，即係墨譜怪傑同夜梟二世都仲拍檔四圍鋤奸，單打時另一人就係AI，亦可以分屏雙打但無得Online。遊戲有六個章節，據知呢隻只係第一輯，劇情仲會繼續發展，希望可以發展到電影劇情啦，其實我最想係做笑面俠，以暴易暴打爆班街頭示威者，再強行帶給絲靈一世無限回憶，嘿嘿。
拳拳到肉恃強凌辱
遊戲係3D動作Game，邊行邊打有輕、重攻擊連技，亦有投擲技可以掉敵人落街或者炒埋佢哋一碟，論簡單直接，不比《無雙》系列差，一樣爽快。
唔同嘅係佢身為動作Game竟然無跳掣！不過連續技動作多變，仲有怒氣計儲滿出超必，見到敵人頭上出現特定按鈕圖示時，反應夠快輸入就會有特寫殘酷招式出現，執佢一劑金鼎嘅！打到佢瞓低？仲可以係咁踢爆佢或者「磧」住佢狂「咪」佢個頭幾拳。晏晝上司無理取鬧、夜晚女友發小姐脾氣、返到屋企仲見到曼聯輸波，呢個Moment我要爆喇！吼吼吼！
未科水先試玩
唔好齋睇，投入《保衞奇俠》世界嘅你又想玩？呢隻Game好特別，街度無得買，你可以上XBOXLive!用1,600點買，亦可以上網買PC版。其實PSN都有，不過只限歐美用家，香港暫時未有。仲有，XBOX360、PS3玩家家都可以Download試玩版，容量都有「激」幾嘢，唔算流。
《Watchmen：TheEndIsNigh》
開發商:DeadlineGames
遊戲平台：XboxLIVEArcade、PC
類型：動作冒險
玩家：1-2
