王晶同文雋最近先後公開批評周星馳為人同態度之後，噚日李修賢到會展出席警匪片風雲二十年嘅論壇時，都忍唔住批評星爺，而且仲越講越激氣，唔通星爺真係咁難相處？
「一早放棄佢」
當年李修賢簽星爺拍戲，不過佢話相處後都唔再搵星爺合作，咁究竟李修賢唔滿意乜嘢？佢話：「交朋接友風度，搵佢傾嘢，佢就唔知諗其他嘢，份人又算太多，當年得咗金馬獎又話冇人工加，我幫佢接咁多戲，一杯奶茶都未飲過。講真我一早放棄佢，我簽成奎安咁粗魯嘅人，帶佢出身，佢都會約我食飯，個個都係朋友，除咗呢個星爺。」
記者話李修賢作為前輩可以同星爺講吓？李修賢聽到笑笑口話：「係前輩又點，識你係老鼠。」李修賢又爆話當年先後有14個黑社會人士上嚟搵星爺拍戲，但佢為咗星爺安全都幫佢頂晒，李修賢話：「我冇同佢講，只係叫佢小心啲，唔通話因住俾人劈呀。」
「做人忠厚啲」
李修賢話咁多年星爺都冇搵過佢，仲笑話都唔知識唔識自己，問到有乜寄語星爺？李修賢話：「做人要忠厚啲，錢唔係萬能，朋友可貴，佢係叻仔，一個人撐得住，但睇吓撐幾耐，跌落嚟時唔係話佢冇錢唔紅，只係再冇朋友。」至於仲有冇合作機會，李修賢話除非星爺唔收錢幫佢拍戲啦，咁可能仲有機會。
