噚日朝開完行會,煲呔就走出嚟話好關注接二連三嘅藥物事故,又話病人服用藥物,啲質素同效力會直接影響健康,口脗似係一位用家多過特首。煲呔忽然咁關心藥物質素,唔少人都關心患痛風症嘅佢,究竟有冇好似立法會議員石禮謙咁,食咗發霉痛風藥。
對於呢個問題,煲呔似乎睇得好開,噚日下晝出席酒會前被問到有冇換過痛風藥時,佢只係笑咗一笑就快步走入會場,仲嗱嗱臨上台舉杯祝酒,其間仲飲得十分豪氣,喺主持每嗌一句祝福說話,佢就次次都大喝一啖,好快就清晒成杯酒。一般醫生都話痛風症病人應該戒酒,唔知煲呔飲完會唔會好似董伯伯咁腳仔痛?