由本港傳統左派，到躋身特區管治班子嘅德成局長，家又攞多個稱號，做第一位帶住官銜訪問台灣、突破港台兩地關係嘅特區局長。德成局長……唔係，可能應該叫德成大師啱啲，事關佢今次係應香港佛教聯合會邀請，封咗個代表團名譽團長稱號，出席台灣舉行嘅世界佛教論壇閉幕儀式。
根正苗紅冇搵錯人
正如港產片經常出現嘅橋段，表面看似摺凳嗰嚿嘢，其實係殺人武器；傳統左派根正苗紅嘅經歷，好多人或者會諗吓局長真正身份係咪中共地下黨員，家做咗佛教代表團名譽團長，真係估佢唔到。正如之前喺立法會上怒斥陳太「忽然民主」一樣，曾德成「忽然成佛」，真係nothingisimpossible。
佛家信緣，凡事都有因果，八方唔知德成局長有冇修行，但無可否認，做第一個去台灣嘅特區局長，唔可以隨隨便便求其搵個人去就算。本來林D9負責兩岸事務，應該係最合適人選，但佢經常講嘢九唔搭八兼自認係人肉MP3，最唔妥嘅係當年佢有份拒絕時任台北市長嘅馬英九入境，搵佢去台灣肯定俾人翻舊賬。
回歸後香港點處理台灣問題，就算前特首董伯伯當年搵咗葉國華做國師，對台關係一直由中央話事，可想而知，今次搵局長去台灣，肯定要阿爺點頭。揀人嘅最重要條件，係中央信唔信得過，曾德成六十年代係高舉拳頭上街抗議嘅憤青，同港英政府抗爭，仲因此坐監，形象正氣凜然。回歸後呢位報界中人加入特區政府，去完中央政策組，再做埋局長，咁嘅背景，自然係中央信得過人選。
台灣人唔止識掟蕉
德成局長喺台灣有演講安排，好多人都想知佢會講乜。根據往績，佢講嘢彈性好大，試過對住新加入立法會嘅陳太指斥「忽然民主、忽然民生」，又可以寫文章悼念武俠小說名家梁羽生咁感性。無論點，八方都想提醒局長，就算要幫口替阿爺勸台灣加快統一，都要顧及環境，事關出名鍾意用行為表態嘅台灣人，絕對唔會掟隻蕉就算。
mailto:[email protected]