無啦啦細姪女走嚟叫我寫車誌，十隻手指黐晒水晶甲邊得嚟打字，口述啦！早幾日夜晚一出車，就見到個黑影駛過，啋！乜有人晚黑出車唔開燈咁大膽？出於女人天生母性，咪追住佢嚟閃，校低窗話佢知無開燈喇！最爆笑個妹妹仔司機騰晒雞話未識開喎，認真叻！話口未完，妹妹仔仲要開錯水撥，仲唔叻叻！咪話大姨媽唔醒兩招基本功過新手，普遍日本車嘅燈掣都置於軚盤右下方，通常轉一下就係細燈，兩下就係大燈，水撥就係左邊嘞。歐洲車就剛剛相反，燈掣喺左邊，水撥掣喺右邊。要留意係一啲高級車款好似Audi咁仲會將燈掣Group埋置於軚盤右下方近門邊位置。簡單啲，油錶錶板熄晒燈咩顯示都無就通常無着燈嘞！