特區政府施政唔掂，唔少商界中人怨聲載道。噚日美商會請咗前政務司司長陳方安生演講，好多商界中人乘機大吐苦水，話喺目前設有功能組別嘅唔民主議會同政府下，商界好多時就環保同公平競爭法提出好橋，都遇到阻礙，有商界亦投訴政府制訂政策期間，好遲先聽商界意見，決策過程亦越嚟越慢。
歸根究柢，商界中人好多時嬲完就算數，梗係俾政府忽視，所以陳太都呼籲商界中人一改政治冷感，希望佢哋積極參與政治，同立法會保持溝通，咁樣先可以改善施政。佢仲呼籲商會要求同唐唐定期會面，反映對社會各項問題嘅關注，唔通陳太擔心唐唐得閒得滯會吊吊fing，希望佢再做多啲嘢？