AIG花紅事件，引起花旗國滿城民憤，搞到華爾街人人自危，遠至大西洋對岸歐洲嘅金融機構都怕受牽連。
噚日彭博資訊爆料，話第一家接受政府泵水救援嘅荷蘭銀行ING，已要求1200名員工，包括200名高層，退還舊年3億歐元（約31.5億港銀）嘅花紅，仲推遲支付今年花紅等非固定薪酬，直到明年另行通知。
金融海嘯，ING獲當地政府注資100億歐元度過難關，家陣見民怨沸騰，高層仲唔速速勸喻員工退番舊年花紅，避免AIG事件燒上身。連ING「欽定」嘅總裁JanHommen都走出嚟解畫，講明會認真檢討未來嘅花紅政策。消息曝光，ING股價即時向上，一個上晝就飆升17%。
除咗ING，法國第三大銀行法興，噚日亦發聲明，話高層將退還認股權，費事受連累。