昨日講開滙豐鄭大班，當日交稿之後，趕去馬場，手機響起，原來係電台鄭大班來電：「喂，你去馬場會坐響邊！」呢位鄭大班好少咁問嘅噃，佢十世唔入馬場，突然來電，唔通有事？果然，鄭大班話：「今晚我要入場，好大機會捧盃，如果你行得開，落埋嚟拉頭馬！」如此肯定？係唔係畀山埃貼士？左丁山食呢類山埃，已有無數次咁多咯。急忙打開馬簿一查，第三場八號「好著數」係鄭大班一個團體嘅，成員有黃楚標、石禮謙、蘇澤光等等，但呢隻馬已經連續輸幾場，呢晚跑「愛爾蘭錦標」，真係有把握贏？
鄭大班果然語不虛發，冇馬贏就唔會入馬場，隻「好著數」順利勝出，仲要臨尾大幅度落飛㖭，唔怪得領獎之時，黃楚標、鄭大班、石禮謙三人笑到見牙唔見眼，石禮謙擺脫星期三立法會會議之糾纏，及時入到馬場贏馬又贏盃，盡吐是日下午在立法會聽辯論之悶氣。（按：上星期三下午辯論教資會檢討，一啲議員事先根本無做功課，隨口噏，當秘笈，石議員唔悶親就假。）
講番志雲飯局舞台真人騷，陳志雲特別告知左丁山，佢粉墨登場，打埋老友心口要佢哋一齊玩，並非旨在賺錢，而係為慈善籌款，四月二十七至二十九日三晚現場售票所得，扣除必要開支後，會捐晒畀「生命熱線」，為防範自殺盡一分努力。左丁山住得背，唔知道甚麼是「生命熱線」，志雲話：「生命熱線於一九九五年成立，專責預防自殺，服務有三大類：（一）24小時預防自殺熱線服務，電話23820000，（二）生命共行──外展長者服務，（三）釋心同行──自殺者親友支援計劃。生命熱線平時搵到唔少朋友做義工，訓練之後，請佢哋聽電話，但一啲朋友聽電話一段時間後，可能覺得人生灰暗，聽電話聽到有窒息感，唔願再做落去，所以生命熱線要不斷搵義工，訓練義工㗎！」如此說來，「生命熱線」嘅工作甚有意義，觀眾買票入場睇志雲飯局即表示人間有情。陳志雲得到「生命熱線」委任佢做「生命大使」，向大眾宣揚預防自殺嘅訊息，自言感到榮幸，希望呢次志雲飯局騷可以為「生命熱線」籌到一筆營運費用喎！