火火編劇的《大世界》是個年輕人成長的故事，心高氣傲要逞強，自以為是卻得不到世界認同，你有共鳴嗎？劇中一句：「唔夠班，你只係茄喱啡！」聽得人心傷又心寒，跌跌碰碰那個細路仔沒經歷過，心雄人不紅，又豈止吳浩康、彭敬慈、Otto和火火？也是你我他在這大世界的成長縮影吧。
記者：蒙為亮
攝影：林栢鈞
Otto
跳舞組合EO2成員之一，2007年奪新城電台勁爆組合獎及勁歌金曲頒獎禮組合銀獎，活躍於舞台劇演出，作品有《早安啊！曼克頓》，《大煞風景》及《BigNose》等。
彭敬慈
舞蹈員出身，2000年《江湖告急》飾演阿虎一角，備受好評，其後作品有《天行者》、《野蠻秘笈》、及《鬼眼刑警》等電影，參演2001年林超賢執導的《走投有路》最為人熟悉。
火火
原名李家榮，多媒體創作人，曾出任《好世界》、《老馬有火》等舞台劇編劇，參演《如廁》、《錦繡豪庭》等舞台劇，今年執導處女作電影《愛得起》。
吳浩康
2002年參加全球華人新秀賽總選得季軍，初出道有「英俊版陳奕迅」稱號，推出過EP《Deep》及《DeepInMusic》，《Deep：Inside》是首張正式大碟，曾參演《新警察故事》。
火火=火 彭敬慈=彭 Otto=O 吳浩康=吳
Let'sdotheworld！
2006年《大煞風景》成績不俗，今次《大世界》少了陳奕迅，換來一種更無框感覺。無框不等於無譜，只是玩得更親民，《大世界》帶出成長金句：「那個少年不輕狂？」輕狂代價往往是學乖乖不了，說曳曳不起，想做大事卻眼高手低，刺正新一代死穴，難怪四個三字頭大男孩如此萬分感慨。
火：《大世界》講五個生活喺貧民區嘅屋邨仔，因為生活逼人，所以放低所有志向同尊嚴，去跟我飾演嘅黑幫大佬打劫銀行，與其叫《大世界》，不如叫《做世界》……
O：哈哈，做世界，即係Dotheworld……
吳：哈哈，唔好成日搞Gag啦，等我講埋個故事先。做完世界，大家以為成功分贓可以過新生活，點知最後反被黑幫大佬追殺。為義氣、為生活大家都要做決定，放棄同堅持喺一念之間。
彭：個劇好似好超現實，不過排排吓劇，自己好有共鳴，好似做番自己咁。
火：梗係啦，我計晒你哋本身性格先寫角色，你份人比較火爆，我會加呢個元素入你角色，Deep成日嬉皮笑臉，所以佢角色比較大癲大肺。咁樣不論演員方面，定係作為編劇嘅我，都會比較易掌握。
O：唔係呀，我想講故事情節令我有好大共鳴，做咗30幾年人，好多嘢都試過，獎又攞過戲又拍過，舞台劇又做過，以為自己好掂，不過有時靜落嚟，總覺得有啲大人認為你唔夠班。我真係想問，要點先算係夠班呢？你覺得唔夠，唔代表其他人都覺得唔夠喎，我有自己諗法，我有新Idea，點解人哋睇都唔睇就一定覺得唔Work呢？呢個情況，彭敬慈應該試過唔少。
彭：哈哈，都有嘅，不過做戲同樂壇唔同，電影導演有權比唱片監製更主觀，例如拍杜Sir，畀你都唔敢主動講咁多嘢啦，博鬧咩，做好自己份內事，演好自己角色已經好足夠，好多點子都會擺喺心，不過我信總有一日，一定用得着。
火：呢套舞台劇嘅中心思想，係想表達一個訊息──細個無機會做，大個又發覺同夢想離得好遠──到頭來只係得番「飲恨」兩個字。
吳：我覺得自己嘅發展一路都唔錯，做錯咗都仲有機會，我都好多謝公司……
O：嘩，好官腔呀，Mani真係教導有方，果然係專業，講句說話都Train過晒。
火：你唔係大世界嘅細路仔，大世界裏面嘅世界仔先真。
變臉導演性格分裂
不知不覺，火火的舞台劇經驗已有10年，他當演員又寫劇又做導演，一人分飾三角，近期還撈過界兼任電影編劇，不得不服。舞台劇初哥吳浩康呢，卻幾乎投降，Deep：「我仲係行偶像㗎！」吳浩康還行偶像派路線？是說真還是說笑？自己定論吧。
吳：哈哈，我唔係講笑，我一出道就行偶像派路線，不過行行吓，唔知點解俾人覺得變咗實力派之嘛。
火：你呢位偶像小生都算幾交到戲，不過表情方面真係要惡補吓，你會不知不覺畀自己嘅三七面觀眾睇，一定係慣咗俾記者影相啦。雖然你無好似Samuel咁特登「Chok樣」，不過做舞台劇都係自然啲好，觀眾會睇得舒服啲，你始終係第一次踏台板，做多幾次，自己會慢慢修正㗎嘞。
吳：得得得，我會改，不過第一日Rehearsal，我真係成個人白晒，原來排舞台劇咁辛苦，時間又長，花嘅精力又多。不過慢慢做慢慢學，嗰種感覺又相當滿足，成個過程我對你都多咗認識，之前以為你好玩得，點知你做正經嘢個樣好認真，搞到我完全唔敢放鬆。哈，又奇喎，點不知你放飯時間又可以和顏悅色番喎，仲學人勁搞Gag引人笑，食完飯埋番位又可以變另一個人，你成個人都性格分裂。
火：鬼咩，Budget唔夠嘛！如果Budget夠，我使鬼同你哋性格分裂。初初度《大世界》呢個古仔嗰陣，我完全無諗過自己會做埋一份，我無諗過自己會飾演黑幫大佬。講真，我好想搵任達華做呢個黑幫大佬角色㗎，不過打電話問過馬偉豪，佢話華哥一組戲都要天價數字，仲要啱啱唔喺香港，我先臨時拉伕頂硬上。不過咁，又做演員又做導演，可以了解演員不足，進程都會快啲，都算係件好事。呢個劇本，係我編劇咁多年以來最滿意嘅一部。
吳：雖然有少少Cult，但故事細節又好中，好似我哋幾個男仔，一齊大一齊壞，開口一句「仆街」埋口一句「妖」，親暱不過，有時男人對男人嘅感情就係咁，懶有型，少說話，不過又會真心關照對方，就好似我哋成日偷懶叫放飯，你都會鬧，但鬧完咪又係笑笑口？男人本身就係咁樣。
Chok樣王vs少年癡呆
網上潮語解說，「Chok樣」即無時無刻「谷」出一副自以為很Cool的樣子。言談中其餘三人揶揄彭敬慈是Chok樣天王，時時刻刻Chok行靚樣，反觀Otto早放下了身段，不過同時也放下了對白，經常忘記對白要NG，累街坊要遲收工。
O：你覺得自己靚仔？所以成日Chok樣？
彭：我不自覺咁做啫，因為拍電影好多部機隨時Roll機，邊部拍緊，要側面定正面你根本唔知，所以只好全情交戲。對比上次《大煞風景》，我已經好好多，起碼會誇張一啲，令觀眾……
O：唔係誇張，係放大，係投放感情，唔係交戲，OK？
彭：OK，你舞台經驗咁豐富，唔會Chok樣，不過你有癡呆症？好哋哋一份對白，你重複背十幾次都唔記得。
O：係呀，一隻舞跳成半個鐘我都記得晒所有舞步，我諗我有文字恐懼症末期。
彭：哈哈，講真識咗你Otto7年，其實套劇入面嘅角色都幾似你，你唔安於現狀，又演唱會又出碟又舞台劇；我就唔同，有戲開有劇拍，我已經好知足。
O：你係㗎，平時唔講嘢經常扮Cool，我諗你今日已經講晒呢個星期要講嘅嘢。
彭：咁家做訪問嘛，如果唔係我都費事同你傾偈，你背好對白先同我講嘢啦。
O：係咩，唔知邊個上次做《大煞風景》連對白都唔記得呢？仲要嗰晚懶瀟灑罰自己唔食消夜，呢幕我真係成世都記得，火火可以做證。
火：哈哈，你自己講番啦，咪要我篤穿你。
彭：嗰次係我衰，Onshow無端端成個人好似鬼上身咁，唔記得晒所有嘢，所以惟有不斷扮型閉目扮諗嘢，好彩有其他演員臨場幫我執生，所以都唔係好覺眼，如果完全撻Q，俾人笑足一世都似。
O：你知就好啦，哈哈……ａ
後記
《大世界》海報有句Slogan：「通往夢想的道路，從來都是荊棘滿途的」，火火、彭敬慈、Otto與吳浩康同樣會為夢想堅持，很多人覺得做Artist很風光，但其實有苦自己知，「半紅不黑」四個字，很凉薄，但卻正正反映到娛樂圈的現實殘酷，發夢的人多，肯努力追夢的人少，我想，堅持追夢的人已值得敬佩，多問大家一句，你的夢想已放在枕頭底，還是依稀記得寫在那本封塵的紀念冊上呢？
他們的作品
他們的大世界
在世界某處貧民區，年輕人為求生活，成為黑幫富豪Poker（火火飾演）手下。以菩流（吳浩康飾演）為首的五名年輕人（Otto，彭敬慈，細So等飾演），有次替Poker打劫銀行，過程中起憐憫之心，將部份錢給予有困難之婦人，因而觸怒Poker反被追殺。一年後，眾人本已各散東西開展新生活，但Poker卻找到他們，逐個獵殺……
《大世界》
日期及時間:
4月22至26日8:00pm
4月25至26日3:00pm
地點：香港藝術中心壽臣劇院
票價：$280、$250、$220
查詢：27349009