今次三日兩夜長測嘅主角，你估吓！貼士：佢畀到我虛榮，但就所費無幾！咪就係i30囉！明明係韓國Hyundai，但偏偏就一副歐洲Look，勁似寶馬1系。齋我話似無說服力，連路人甲乙丙都一樣，用行動話我知：搞錯晒！事關兩者車側以至車尾都勁似，睇唔真絕對會將i30誤以為係1系小馬車呢！
記者：梁美甜
攝影：陳陶鈞
模特兒：Suyen
趣事兩則
先唔講車，嚟睇睇今次長測嘅爆笑實錄：
1.戇男拉車門
接過車第一日就去九龍城附近食個Tea，食飽去攞車，竟然見到個男人係咁拉我部車嘅車門，之後再走去望一望車牌，爆笑嘅係佢部白色1系座駕原來停喺兩三個車位後面。佢自己都一臉尷尬，梗係，自己車都認錯！
2.再錯叻唔切
當晚約咗朋友去佐敦開飯，將部車泊去吳松街附近以車用上落嘅停車場，一駛入去門口，看更阿叔同泊車阿伯就叻唔切猛讚部車靚，仲賴醒咁話係寶馬新車！係就係新車，之不過唔係寶馬囉！雖然假假哋，不過都有啲虛榮。
都唔使我費筆墨去形容，i30外形酷似BMW1系120i或130i車款，尤其係車尾部份，而且有相似嘅車身線條同低重心。當然馮京點都唔同馬凉喇。
升班感覺
其實我第一眼望到部車，都唔係好信自己對眼，即時望一望車匙上面個車牌「冧巴」同牌子，真係Hyundai而唔係寶馬喎！真係估唔到部i30同1系像真度咁高。近年Hyundai旗下汽車質素越來越好，最明顯係上落車關門嗰下「呯」一聲，較以往低沉同實在，我唔係咁堅靠聽聲辨質素，只係中型房車好似Camry、Accord、Corolla都係咁上下，證明車架及剛性同新一代中型房車有得揮，較以往進步。近年由仁孚接手代理之後，更加入高檔次售後服務，為現代增加唔少升班感覺。現代車價不嬲偏向經濟，長測嘅係i30頂級版2.0公升，都只係16萬左右，而入門版1.4公升手波版仲唔使14萬，試問邊有同級車做得到？
好玩抵玩
平嘢無好？仲信呢套？Out晒啦！其實揸車最重要係自身感受，i30外形夠撐，一啲都唔輸畀歐日車種，加上內櫳夠闊落，尤其尾廂，揭背式夠方便，容積大放得落幾個行李篋！性能方面，起步加速反應比想像好，上屯門公路、9號幹線等高速都覺得部車夠力，切線煞車反應快而靈敏，不過上落大斜路時最好預先加速，免得上住嚟加速喘晒氣咁嘥油！高速跑住成百公里都算定，最重要係副偈夠靜。高速劈住入彎循迹及指向性都幾好，連攝影師都連聲話：「估唔到好咗咁多！」係！實際試揸過後，大家不約而同讚：抵玩！十幾萬咁靚仔仲要副偈係2.0CVVT，一缸油跑幾日差不多成五百公里都咪話唔慳油，美中不足係香港人固有觀念「韓國車好渣」未Tune，無咩二手市場囉！
規格
引擎：1,975cc直四
馬力：143hp/6,000rpm
扭力：19.0kgm/4,500rpm
傳動：四前速自動波，前驅
售價：$162,000起
查詢：現代汽車（34288288）