雖然有旺旺老細蔡衍明呢條大水喉射住，但亞洲電視似乎仍然繼續其縮皮工程，下月起將現時六條數碼廣播頻道重組成三條24小時數碼廣播頻道。發展及對外事務高級副總裁鄺凱迎堅持唔係有經營困難，但外界信唔信就係另一回事。
$1000蛋糕未找數
立法會好多議員都關注亞視係咪冇水，謝偉俊噚日喺財委會會議上，話睇到有報道話亞視連今年1月慶祝數碼廣播1周年時所用嘅1,000蚊蛋糕錢，都未找數，仲欠落幾百萬版權費，認為政府應該做好亞視執笠嘅應變準備。但謝超人嘅好意政府唔多領情，商務及經濟發展局局長劉吳惠蘭堅持無意介入亞視運作。
高達睇唔過眼，話家雖然有兩個免費電視台，但根本無競爭，加上亞視管理層非常混亂，政府應該嚴肅檢討亞視嘅存在價值。高達同時關注前途未卜嘅港台，話有港台中人大呻被政府陰乾，搞到佢哋想請人同添置器材都難過登天，甚至要借浸大studio做節目，講出嚟真係俾人笑。在座嘅廣播處處長黃華麒即時反駁，話港台員工士氣好番好多，目前最重要固本培元。睇怕港台都係要透過自強，減少被政府宰殺嘅危機。