八方好多朋友近排晚晚追睇《學警狙擊》，實Laughing哥究竟會唔會翻生，睇吓謝天華點樣以42歲高齡重投警隊懷抱。講開又講，原來現實生活中，都開始有人年過36先投考警員，做中年學警。八方唔係講笑，呢單料有根有據。
警務處近日回覆立法會議員有關09/10年度財政預算嘅提問時，透露08至09年度（即去年4月至呢個月底），首次有兩位36至40歲嘅人士投考學警，仲成功入職。至於31至35歲先半途轉行入警隊，都有六個咁多。睇番04至05年度嘅數據，當年年紀最大嘅學警，都係30歲以下。督察方面，本年度亦有四位31至35歲嘅人投考，係04年以來嘅新高。唔知警隊會唔會擔心部門人手老化呢？
師叔處理案件夠壓場
八方同啲熟悉警隊招募嘅阿sir傾過，佢哋話呢幾位年紀較大嘅學警，全部通過體能測試，能力上一啲問題都冇，亦反映警隊請人冇年齡歧視，通過測試就可以加入。有咁多高齡學警，可能同警察舊年勁請1,200人，請得人多有關。聽聞呢批就快四字頭嘅學警，喺唔同時段加入警隊，應該同金融海嘯後多咗人被炒，想搵番個鐵飯碗無關。
呢位阿sir仲話，年紀大先投考警察未必一定較年輕嘅投考人蝕底，皆因面試時，阿sir對住個年紀輕輕嘅應徵者，會花好多時間去研究清楚，究竟呢個後生仔夠唔夠成熟？有冇心長遠留喺警隊度發展？但當成36歲人先去考警察，一般都夠晒成熟穩重，可以喺呢方面先贏到唔少印象分。
八方以前都同啲後生警員傾過，佢哋話有時處理案件時，都會因為年紀細而遇到問題，好似處理家暴投訴咁，有時報案人人生經驗仲豐富過阿sir，想勸交都唔係咁易。相信呢啲時候，成熟穩重嘅新紮師叔一定可以壓得住個場。
不過，如果你有上進心，諗住入警隊要做一哥，咁就梗係趁後生考警察機會大好多，事關警察一般要五年先有機會升一級。有心水清嘅警察計過數，如果你36歲先加入警隊做警員，又好好彩咁再考到升做督察，再好好表現咁次次升級都有你份，咁當你退休嗰陣，都應該有個警司可以做吓。不過，吓吓都咁好彩，就不如去買六合彩。
mailto:[email protected]