娛樂圈有個汪阿姐最唔鍾意人遲到，立法會嘅卿姐一樣着重守時。噚日立法會財務委員會開始一連幾日審議預算案，第一節朝早8點45分舉行，點知到咗開會法定時間，議事廳仲未夠8個開會人數，身為主席嘅卿姐當然好緊張；十幾個政府高官已經喺晒度，唔通叫人白行一趟？
當時民建聯已經有四個議員喺度，加埋工聯會王國興，估唔到左派咁捧卿姐場。泛民主派就人丁單薄，除咗民主黨張文光，其他仲未見人，再加上獨立議員梁君彥，差一個先夠數，搞到張文都急急出去尋人，好彩公民黨吳靄儀稍後趕到，令會議唔使流會收場。抹一額汗嘅卿姐最終忍唔住講咗句，希望大家準時開會，可能係唔想血壓再度急升。