睇到「任飲任食」四個字已令腎上腺素上升，口水直流，不過講起日式放題，大部份係劣評居多，嘥錢事小，浪費quota冇啖好食事大。不過凡事有例外，平價與高質素都可以並存，另加$30食到北海道新鮮直送的松葉蟹，真係諗都無諗過﹗
$178＋$30嘆北海道松葉蟹
紅磡崇潔街曾是日本料理黃金地，如今熱潮已過，新開的燒魂屋，就靠三小時超長時間任食放題成功突圍，想食請四日前訂位。一般壽司刺身已不能滿足嘴刁港人，燒魂屋的晚市放題做緊半價$178，更大賣點是加$30就可以嘆北海道松葉蟹，是市價$300的十分之一價錢﹗以為好着數？連超巨型2公斤重的花咲蟹，日式超市賣千五蚊一隻，食放題加$250就食到，3公斤重則$350。兩款蟹都是北海道直送到港，沒有將貨就價。
放題本身食物質素都有番咁上下，主打的串燒全是生燒，不是預先煮熟，慢慢用電爐燒成，外脆內裏有肉汁。店方透露周末高峯期可燒出一萬串！必吃有和牛串燒，雖不是A級神戶牛，但經理拍心口保證是日本入口和牛，食多幾串已回本；加上刺身、天婦羅、吉列等百多款選擇，星期日至四9-12點一輪，汽水啤酒更任飲。
價錢：分6pm-9pm、9pm-12pm兩時段，任食3小時（原價$356、現半價$178）。
燒魂屋（29888441）
紅磡庇利街34-36A號地下
$298拖羅海膽冷豆腐
講日式放題，不少放題粉絲都推介碗屋。店舖位於中環，以食物質素高聞名，經常旺場滿爆，想惠顧，建議先致電訂座了解情況。碗屋15年前由日本人開設，98年才引入放題時段，是全港首間辦放題的日本料理。星期一至四晚市放題每位$328，過百款美食任叫，更設有爐端燒、火鍋等特別食品。星期五、六每位$298，每位送一客鮑魚或螺肉作前菜，另有50款食品任點任食，刺身、鐵板燒、手卷都有。刺身選擇多，少有的劍魚腩和希靈魚都有。
價錢：星期五、六及公眾假期晚市$298
碗屋（25218807）
中環皇后大道中18號新世界大廈閣樓
$100日式shabushabu
日本過江龍牛陣的ShabuShabu放題，晚市任食90分鐘，可揀澳洲牛（$100）、上級牛肉（$140）或特選和牛（$350），牛肉可不停refill。除了清湯，還有豆乳及鐵觀音湯底，豬肉、蔬菜、雪糕等任食，難怪人龍從未停過。
價錢：每位$100-$350
牛陣（21726322）
觀塘創紀之城5期4樓22-23號舖
$105泰抵食
任飲任食泰國菜坊間難尋，金葉子泰式放題由8pm食到11pm都係$123，有咖喱蝦、明爐魚等80幾款美食，連特飲珍多冰、青檸梳打都係任飲。首輪5:45pm-8pm及消夜9pm-11pm的時段更可有八五折優惠。
價錢：平日每位$123、假日每位$133
金葉子（28360917）
紅磡德豐街8號黃埔花園9期百合苑商場地下10號舖
