張天愛由10歲開始跳芭蕾舞，30年來培養了驚人意志，更因芭蕾舞得到愛情、事業、婚姻，近年轉向幕後做製作人的她，更請人創作芭蕾舞勵志故事搬上大銀幕。
情牽芭蕾舞一生的張天愛，日前率先觀看由香港導演李志毅執導、講述舞蹈的日本電影《舞吧！昴》，深受感動，她說：「戲中女角好鍾意舞蹈，喺失去至親傷心期間，憑住對跳舞嘅熱愛同奮鬥，成功走出陰霾，有點感同身受。」
「特別吃得苦」
張天愛續說：「因為我10歲時考取英國皇家芭蕾舞團，不斷受到嚴謹地獄式訓練，其間媽咪得到癌病，我受到好大打擊同失落，佢同我講『唔好浪費時間』，鼓勵我唔好放棄，要更加積極，所以成功成為舞團女主角。」她更笑言學芭蕾舞恍如得到了內功，她說：「學芭蕾嘅人特別吃得苦，我當時斷腳，病咗發燒都要繼續。」
張天愛表示芭蕾舞在心中排第一位，她笑說：「連Russell（丈夫羅素）都係學芭蕾舞時識，我都好鼓勵家長畀小朋友習舞學鬥志。」張天愛與羅素在美國成立學校，提供舞蹈和功夫等課程，當中更希望可以提拔新一代投身電影業，她說：「好似章子怡有舞蹈根底，可以拍武打或舞蹈片，加上英文越嚟越好，可以話亞洲區冇人及得上。」
正找投資者
近年熱愛電影，又積極做經理人及向幕後製作發展，問張天愛會否將自己艱苦的芭蕾舞血淚史拍成電影，她笑說：「心目中有一個好好嘅芭蕾舞古仔，不過唔會用自己做故事主人翁，已着手叫阿哥寫緊個劇本，希望快啲搵到投資者。」
採訪：RitaLeung
攝影：ChanShunChing