香港製衣業國際聞名，但講到企業透明度同社會責任，就拍馬都追唔上外國同行。樂施會噚日公佈《企業透明度報告》，搵咗26間本地龍頭成衣公司，睇吓佢哋喺管治水平、同員工溝通、工資水平等範疇，有冇顧及社會責任。
一查之下，有19間企業得分零蛋，皆因佢哋完全冇公佈上述資料，一啲透明度都冇。呢批黑箱公司，包括田二少嘅縱橫二千、曾憲梓間金利來、立法會議員方剛家族間Toppy、邱淑貞老公沈嘉偉間I.T、同埋最近搵天真嬌賣廣告嘅包浩斯國際等等。樂施會話佢哋好有改善空間。
不過，都有企業值得表揚，例如行會新貴楊敏德間溢達集團，得70分，排第一。香港政府策略發展委員會委員馮國經嘅利豐排第二，有33分，但仍輸楊敏德成條街。