西甲爭標好戲，一啲都唔比嗰邊英超遜色，周日皇家馬德里先大炒艾美利亞3:0，夜場巴塞隆拿更勁，贏夠馬拉加6:0，波友要「主勝」有「主勝」，要「大」有「大」！呢啲場次用嚟睇同賭，做球迷真係多多都唔拘。
「獵人」差伊度奧17粒難追
皇馬呢期有「獵人」亨特拉爾做咗風頭躉，近6場入咗8球，包括周日梅開二度，加埋馬些路右腳重炮勁射先開紀錄，主場數夠艾美利亞3粒。亨特拉爾腳風咁順，搞到教練拉莫斯將另一射手希古恩打落冷宮做後備。
不過計我求大俠話，呢位1月份加盟嘅「獵人」都算發力發得遲，要獵殺巴塞嗰邊隻「非洲豹」伊度奧，幫皇馬力追榜首巴塞真係難過登天！家陣巴塞有69分，皇馬有63分，聯賽雖然仲有10周要踢，但睇見伊度奧、美斯個個好似食咗藥咁狂入波，皇馬要後上封王，機會其實好微。好彩，早前亨特拉爾同洛賓兩位荷蘭兵鬧不和，不過今仗就攬頭攬頸，「獵人」更表示已冇晒事：「誤會嚟啫！」
巴塞贏6粒 哥帥話正常
再睇西甲射手榜，伊度奧暫以25球領導群雄，連第2嘅美斯、科蘭同韋拿都有19球，家亨特拉爾得嗰8球咁大把，點追嗰隻快到無倫嘅「非洲豹」？照我求大俠睇，「獵人」下個球季先再同伊度奧搏命啦！
西甲鬥得精采，就算開波時間咁夜都冇有怕，至少有入球騷已值回票價。好似巴塞周日就憑伊度奧梅開二度、沙維、美斯、亨利同丹尼爾各建一功，主場大派6隻光蛋畀馬拉加，盡顯榜首氣派。賽後教練哥迪奧拿仲好囂話：「我隊波唔止咁少料，6:0算係發揮正常嘅戰果；我相信只要球隊再集中啲，季尾表現仲勁！」
其實，巴塞係就係大勝咗一場，不過就損兵折將，恩尼斯達同耶耶托尼喺對馬拉加時受傷，兩位中場都預計要唞兩個禮拜，仲齊齊因傷被迫退出國家隊，冇份踢世界盃外圍賽㖭！