由劉鎮偉執導嘅《機器俠》噚日喺會展舉行記者會，演員方力申、鄭中基同吳京都有出席，但焦點就落喺劉鎮偉身上，因為同劉鎮偉合作過《西遊記》等多部電影嘅周星馳近日捲入口舌之戰，多位導演、電影人都話星爺工作態度有問題，文雋仲喺網誌話星爺嘅年代結束。
「佢好尊重我」
噚日劉鎮偉就力撐星爺，佢話：「其實每個人都會自我，每次同星仔見面佢都好尊重我，可能有啲導演唔鍾意演員問嘢同畀意見，亦都有可能係導演滿足唔到演員嘅要求。」佢話星爺當年拍《西遊記》時，曾對演繹孫悟空覺得困惑，最後經劉鎮偉指點迷津之後，星爺就參考占基利（JimCarrey）嘅《變相怪傑》（TheMask）中嘅演技。
劉鎮偉大讚星爺係聰明嘅演員，所以佢唔排除雙方會再合作，佢話：「當年佢搵我幫手拍《功夫》，我講明唔希望喺片場聽到鬧人聲，最後都冇鬧人事情發生，我就覺得好開心，係星仔有進步，不過我唔係話佢成日喺片場鬧人，我係聽人講同睇報紙寫，所以先畀意見。」對於文雋指星爺嘅年代結束，劉鎮偉就抵死話會提議星爺喺結束前拍一齣戲好好享受吓先。
此外，小方透露今次飾演一名類似祖迪羅（JudeLaw）喺《人工智能》（A.I.）中機械人，仲會同孫儷有一段點到即止嘅感情戲，當中佢仲會同吳京有唔少對打戲，小方話拍嗰陣喺心口墊定軟墊。至於鄭中基提到前女友楊千嬅家感情生活穩定時，佢就話戥佢開心。
