上海世茂佘山莊園F1型別墅早前有大豪客用2.5億（人民幣．下同）買咗，破咗全國最貴豪宅別墅紀錄，聲名鵲起。大家最關心，係邊個大豪客喺海嘯下仲咁有米、咁有膽識入貨。
上個周末世茂房地產（813）請華華同一班行家去上海出席簽約儀式，其間帶傳媒參觀佘山莊園F1型別墅嘅模型，介紹嘅銷售主管幾經傳媒追問，露咗少少口風，話買家係香港人！
銷售主管露口風
香港大豪客咁多，係邊個呢？姓乜？幾歲？呢啲問題銷售主管一味話唔知，只講係用個人名義買喎。傳媒轉而向世茂副主席許世壇進攻，希望佢又漏少少口風，點知佢把口更密，仲好「謙」咁話：「買家的事我怎會知？」淨係話幢別墅意向價3億銀，家陣2.5億銀就買到，真係「好平」喎。
雖然套唔到料，一場嚟到，班傳媒梗係想見識吓呢幢全國最貴別墅，於是導賞團臨時改行程去咗F1型別墅。
管理費4萬幾蚊
高價易手的F1型別墅共有3幢物業，室內總建築面積4.3萬方呎，單睇別墅外貌已經好宏偉，雖然仲係施工中，但都可以見到個室內泳池、酒窖、合乎國際標準嘅私家保齡球場，同埋連接小島嘅橋樑。別墅連埋屋外花園，佔地成40畝（約28.7萬方呎），每月管理費4萬幾蚊，香港一般打工仔真係連管理費都畀唔起。
李華華
mailto:[email protected]