「一路通」行政總裁葉松茂同敦豪國際（DHL）亞洲區創辦人鍾普洋兩個老友，從商之餘齊齊撈埋教育，喺港大商學院開壇，向大學生傳授創業搵銀心得，仲將教材整理成書出版，噚日搞簽名會，唔少老友到場。
陳方安生一見本書就心急翻開嚟睇；梁智鴻醫生就變咗小粉絲，排隊等簽名；曾經同葉松茂搞36.com，又曾經同鍾普洋組織珠三角基金會嘅「大班」鄭經翰，同兩人都咁有淵源，點可以唔到。主辦單位本來話東亞（023）主席李國寶會到，可惜最後唔見人。
葉松茂話，同鍾普洋喺港大教創業學時，發覺啲書唔太啱用，所以先自己做教材。講到香港人創業，佢話啲人開始創業時只會寫計劃書，而佢覺得計劃書只係做畀人睇，實戰時冇得plan，不如花時間同心機去度產品，點樣煞食同令人非買不可，5年後又可以點發展好過。