瑞士球王費達拿近一年已經被西班牙球手拿度「剋死」，拿度取代咗費達拿做網壇「1哥」就不在話下，對上3次喺大滿貫決賽都解決費達拿，包括上個月喺澳網勝出，令費達拿灑下英雄淚，搞到「拿度剋星論」炒得熱辣辣，之不過，原來費達拿嘅剋星唔止一個西班牙仔，原來仲有網壇新星「梅禮先生」。
遇梅禮連輸4鑊
21歲嘅梅禮來自最講禮儀、紳士風度嘅英國，佢喺上周六就喺印第安韋爾斯網球賽4強做咗「程咬金」，阻住拿度同費達拿嘅「夢幻對決」，以盤數2:1贏咗費達拿，連同今年嘅阿布扎比同卡塔爾網球賽，梅禮踏入09年已經贏咗費達拿3次，計埋舊年年終賽更加4連勝，似乎要話畀費達拿聽：「我喺你剋星」咁話。
之後梅禮賽後仲暫時放下紳士風度，以「勁寸」態度話：「每次我同費達拿交手，我眼中只有一個贏字！」簡直當奪得13個大滿貫錦標嘅費達拿冇到！我求大俠就一向好支持費達拿，覺得佢球技同球品都係一絕，賽後佢仲大讚梅禮打得好，值得打入決賽；雖然話成王敗寇，但到咗呢一刻，我求大俠就睇到「級數」嘅分別，梅禮就真喺要學吓野喇！
追求完美更易犯錯
費達拿連續幾次唔夠梅禮打，家仲要俾人咁寸法，我求大俠就好想幫吓佢，於是就搵咗nowsports網球台嘅主播同評論員錢惠民，問吓點解會咁。錢惠民就話費達拿個心根本唔喺度，淨喺識得諗點樣平森柏斯嘅14個大滿貫紀錄，同埋「完美主義者」性格搞到費達拿要球球都打得好，就好似今場犯咗32個冇壓力下嘅錯誤，仲要輸埋，唔似得梅禮輕輕鬆鬆咁打。
何況費達拿嘅體力已經唔可以同當「弗」時比較，自然贏唔到梅禮啦！我求大俠都好同意錢生嘅睇法，費達拿要重返世界第1位真係唔好諗太多，化壓力為動力，遲啲再同梅禮打過！
