啱啱獲委任為房委會成員嘅公民黨梁家傑好事成雙，噚日喺樂富橫頭磡開設九龍東第二個地區辦事處。最近先喺煲呔大雪房獲解凍嘅袋巾成為房委會新貴，對口單位點都要派人嚟賀一賀，副局長邱誠武今次身負重任，親臨橫頭磡，同勞工處處長謝凌潔貞一齊做特別嘉賓，希望日後合作愉快。
公民黨黨魁余若薇同主席關信基都有到場打氣。雖然係同區對手，但白鴿黨肥仔明同袋巾算係泛民盟友，因此亦同獨立議員陳茂波齊齊亮相，祝佢開工大吉。袋巾仲搵嚟前藝員、現任大狀嘅盧敏儀幫佢做主持，盧敏儀台上一句袋巾24小時服務街坊，即刻得到台下市民熱烈回應，睇怕袋巾以後都會日日做到冇停手。